Li Amûdê perestgeheke êzidiyan tê amadekirin

Mala Êzidî ya Kantona Cizîr ji bo bîranîna şehîdên komkujiya Şengalê, li gundê Dugirê yê rojavayê bajarê Amûdê, merasîmek li dar xist. Her wiha di merasîmê de kevirê yekemîn ê avakirina perestgehekê danî.

Endamên civaka Êzidî, nûnerên rêxistinên civaka sivîl û şandeyeke Rêveberiya Xweser a Bakur û Rojhilatê Sûriyeyê, nûnerên partiyên siyasî, her wiha şandeyên ewropî û ji başûrê Sûriyeyê jî beşdarî merasîmê bûn.

Di merasîman de endamê Meclisa Rêveber a Yekîtiya Êzîdiyan a Sûriyeyê Fewzî Cûlî şehîdên komkujiya Şengalê bi bîr anî û diyar kir ku armanca êrişkaran ew bû ku nasname û dîroka civaka Êzîdî ji holê rakin.

Cûlî tekezî li ser rola berbiçav a jinên Êzîdî di berxwedan û şerê li dijî her cûre kuştinê de kir.

Piştre, 2 endamên Meclisa Rohanî yên ku ji Laleşa Nûranî ya Başûrê Kurdistanê hatine Bavê Çawîş û Pîşîmem, her wiha gelek rûspiyên saziyên olî, perde ji ser kavirê bingehîn ê perestgehê vekir.

Piştre rêvebera Meclisa Malbatên Şehîdan a Bakur û Rojhilatê Sûriyeyê Rêzan Gulo axivî û got: “Perestgeh dê nûnertiya hemû pêkhateyên Sûriyeyê bike û ji bo civaka Êzidî bibe çirayeke ronahiyê.”

Hevserokê Meclisa Rêveber a Rêveberiya Xweseriya Demokratîk a Bakur û Rojhilatê Sûriyeyê Hisên Osman diyar kir ku ew bi civaka Êzidî re di nav hevkariyê de ne û destnîşan kir ku ev komkujiya li dijî civaka êzidî dê neyê jibîrkirin, bidestxistina edaletê û parastina êzidiyan, maf e.

Endama rêveber a Yekitiya Jinên Êzidî ya Sûriyeyê axivî û destnîşan kir ku pêkhateyên herêmê hemî bi civaka êzidî re hevkar in.

Her wiha Diyaa Ebdullah ku ji bajarê Siwêdayê hate vir, kêfxweşiya xwe ya li herêmên bakur-rojhilatê Sûriyeyê anî ziman û got: "Civaka we civakek piralî ye, ku nûnertiya hemû pêkhateyan dike. Em, ji Siwêdayê, mîna we ne. Em her kesî qebûl dikin û bi her kesî re dijîn."

Hevserokê Partiya Yekitiya Demokratîk (PYD) Xerîb Hiso jî anî ziman ku perestgeha pîroz li ser axa pîroz tê avakirin ku bi hezaran salan berxwedan û têkoşîn li ser hatiye meşandin.

Hiso destnîşan kir ku perestgeh, dê bibe nasnameya nifşê siberojê û dîrokeke zindî be.

Di merasîmê de peyamên pîrozkirinê hatin pêşandan, jê peyama fermandarê giştî yê Hêzên Sûriya Demokratîk (QSD) Mezlûm Ebdî û şêx Murşid Xeznewî yên ku avakirina perestgehê ji bo parastina nasnameya olî û çandî ya civaka êzidî û xurtkirina hebûna wan a dîrokî, bi gaveke pîroz û erkekê wesifandin.

Merasîm bi xwendina helbesteke li ser komkujiya Şengalê ji aliyê helbestvan Ferhad Mardî ve bi dawî bû.

(ac/şx)

ANHA