Kongreya Mala Êzidiyan dest pê kir

6`emîn Kongreya Mala Êzidiyan a kantona Cizîrê li xwaringeha Marbêla ya bajarê Hesekê dest pê kir. 

Di kongreyê de 300 delege hazir in. Nûnerên Mala Êzidiyan bi cil û bergên xwe tev li kongreyê bûne. Her wiha şaneyên Rêveberiya Xweseriya Demokratîk a Bakur û Rojhilatê Sûriyeyê, Tevgera Civaka Demokratîk (TEV-DEM), partî, saziyên sivîl, oldar û rûspiyên êlên Ereb jî beşdarî kongreyê bûne.

Hevserokên Mala Êzidiyan a kantona Cizîrê Leyla Îbrahîm û Farûq Tozo bixêrhatina beşdaran kir.

Leyla Îbrahîm wiha axivî: "Em bi xêrhaitna we dikin. Bi hebûna we em gelek kêfxweş in. Em destnîşan dikin ku hebûna we, moralê me bilind dike, têgeha biratiya gelan û fikreya neteweya demokratîk disepîne."

Leylayê îşaret bi êrişên li dijî herêmê kir û got: "Rêveberiya Xweser karî xwe bi pêş bixe û hevpeymana civakî bi dawî kir ku ji aliyê gel ve hate qebûlkirin. Bi van xebatên xwe dijmin tirsand ji ber wê har bûn û êriş binesaziya herêmê kir."

Leyla Îbrahîm da zanîn ku lidarxistina kongreyê di vê demê de bersivdayîna êrişên dijminan e ku gelê herêmê dê li ber xwe bide û piştgiriya rêveberiya xwe bike.

Hevserokê Meclisa Malbatên Şehîdan Rêzan Gulo hêvî kir ku kongre bi biryarên girîng ku civata êzidî ji vê bêtir birêxistin bike, bi dawî bibe. Gulo got: "Çeteyên DAIŞ`ê li Şengalê û Kobanê komkujiyên hovane kirin. Siyasetên wê dişibin dewleta Tirk a dagirker ku li ser xwîna gelan ava bûye û komkujî li dijî ermen, suryan, kurd, ereb û asûran kirin. Lê belê gelê Rojava û Şengalê karîn li hember her duyan bisekinin."

Cîgirê hevserokatiya Meclisa Rêveber a kantona Cizîrê Mihemed El Birak rola Rêveberiya Xweser di rizgarkirina Şengalê û parastina wê de ji hêzên tarî ku hevalbendên dewleta Tirk in, xilaskirina jinên şengalî ji lepên DAIŞ`ê di Operasyona Mirovî û Ewlehiyê de silav kir.

Dûre sînevizyonek têkildarî kar û xebatên Mala Êzidiyan ên 2 salan hate pêşandan.

Mala Êzidiyan sala 2012`an hate avakirin, 3 şaxên wê hene ku ya sereke li navçeya Amûdê ye.

Kongre bi xwendina peymanên pîrozkirinê berdewam e. Çaverê ye ku di kongreyê de rewşa rêxistinî, rêzikname werin nîqaşkirin û hin guhertin tê de çêbin. Her wiha hevserokatiya nû jî dê were hilbijartin.

(şx)

ANHA