‛Karker avakerên aboriya civakî ne’

Şêniyên bajarên Girkê Legê, Çilaxa û Dêrikê bi dirûşma "Bi banga Aştî û Civaka Demokratîk werin em bi hev re 1'ê Gulanê pîroz bikin" 1'ê Gulanê li gundê Siwêdikê pîroz kir û got ku karker avakerên aboriya civakî ne.

ROJANE

1 gulan, 2025 17:37

QAMIŞLO

Şêniyên bajarên Girkê Legê, Çilaxa û Dêrikê Cejna Karkeran a Cîhanê (1'ê Gulanê) li gundê Siwêdikê yê bajarê Dêrikê yê kantona Cizîrê pîroz kir.

Di pîrozbahiyê de hevserokê rêxistina Tevgera Civaka Demokratîl (TEV-DEM) Ebdulselam Mehmûd got ku Rêber Abdullah Ocalan temsîla sembola têkoşîn û rûmeta mirovî ya li hemberî zulm û zordariyê dike û got: "Karker avakerên aboriya civakî ne."

Cîgira hevseroketiya Meclisa Rêveber a kantona Cizîrê Hemrîn Elî jî diyar kir ku karker li gorî nirx û pîvanîn edalet û wekheviyê kar dikin û ew nûnertiya civaka azad dikin, ku armanca wan jî her tim xizmetî gel û welatan bikin.

Endamê Meclisa Malbatên Şehîdan Mihemed Şerîf Derwêş 1'ê Gulanê li karkeran pîroz kir û got: "Karker ji bo avakirina welatekî azad û demokratîk tê dikoşin."

Di şahiyê de komên Cûdî, Elefteriya û Şehîdên Qereçox berhemên hunerî pêşkêş kirin. Her wiha hunermend Sumeye Mihemed, Tariq El Hisên, Hesen Dêrik, Waêl Haco û helbestvan Ferhad Merdê berhemên xwe pêşkêş kirin.

Şahî bi gerandina govendan bi dawî bû.

(mh/fr)

ANHA

Dêrik