Hemdan El Ebid ji bo parastina serdestiya xaka Sûriyeyê bang li Komkara Erebî kir

Cîgirê hevserokatiya Meclisa Rêveber a Rêveberiya Xweser a Herêma Bakur û Rojhilatê Sûriyeyê Hemdan El Ebid der barê êrişên 23-27ˈê Cotmehê yên dewleta Tirk a dagirker ên li ser herêmê de axivî.

Hemdan El Ebid diyar kir ku êrişên dewleta Tirk a dagirker ên li ser xaka Sûriyeyê encamên feraseta qirkirin û dagirkeriyê ya AKPˈê û hevkarên wê ye.

El Ebid anî ziman ku dewleta Tirk bi van êrişan dixwaze nakokiyên siyasî yên li Tirkiyeyê derbasî herêmê bike.

El Ebid êrişên dewleta Tirk a dagirker ên li ser herêmê wek "binpêkirineke mezin a serdestiya xaka Sûriyeyê, ewlehiya wê ya neteweyî" nirxand û wiha domand "Ev êriş aloziya Sûriyeyê û êşên sûriyeyan zêdetir dikin. Di heman demê de hewldaneke ji bo têkbirina projeya Rêveberiya Xweseriya Demokratîk e ku tevahî pêkhate û beşên gelê Sûriyeyê li dora wê kom bûne.”

Hemdan El Ebid bêdengiya "dewletên garantorên agirbestê" li hemberî êrişên li ser gelên Bakur û Rojhilatê Sûriyeyê jî rexne kir.

El Ebid îşaret pê kir ku Komkara Erebî berpirsa parastina serdestiya xaka Sûriyeyê ye û bang lê kir ku hemberî destwerdanên Tirkiyeyê yên di dosyaya Sûriyeyê de helwesteke xurt nîşan bidin û dagirkeriya wê ya li welat bi dawî bike. Her wiha bang kir ku ji bo avakirina Sûriyeke nenavnedî û destûreke ku ji aliyê tevahî sûriyeyiyan ve were qebûlkirin, serdestiya xaka Sûriyeyê biparêze.

Hemdan El Ebid helwesta hikumeta Şamê ya li hemberî êrişan jî rexne kir û wiha pê de çû: “Hikumet Şamê banga parastina yekitiya xaka Sûriyeyê dike, lê êrişên li ser Herêmên Bakur û Rojhilatê Sûriyeyê paşguh dike û dosyaya dagirkeriya Tirk û êrişên wê yên domdar ên li ser xaka Sûriyeyê naxe rojeveke navneteweyî."

Cîgirê hevserokatiya Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê di dawaiya axaftina xwe de bal kişand ser helwesta Rêveberiya Xweser û got: "Helwesta Rêveberiya Xweser a ji bo çareserkirina pirsgirêk û aloziyê diyar e, ew jî diyalog e. Rêvebeiya Xweser amade ye bi hemû aliyan re û hikumeta Şamê re diyalogan bike. Civaka Bakur û Rojhilatê Sûriyeyê şer naxwaze û aştîxwaz e.”

(bb)

ANHA