Di Roja Şehîdan de soza şopandina rêça wan hat dayîn

Li kantonên Reqa û Tebqayê, bajarê Kobanê, Şedadê û taxên Şêxmeqsûd û Eşrefiyê yên Helebê şehîdên meha Gulanê bi pêxistina mûman li ser gorên şehîdan hatin bibîranîn.

TEBQA

Li kantona Tebqayê jî Meclisa Malbatên Şehîdan a kantona Tebqayê û ya Efrîn û Şehbayê di Roja Şehîdên Tevgera Azadiya Kurdistanê (18'ê Gulanê) de şehîd Hakî Karer û tevahî şehîdên azadiyê bi bîr anîn.

Şêniyên bajarê Tebqayê û yên Efrîn û Şehbayê, endamên Rêveberiya Xweser a kantonê û desteyên wê, Tevgera Ciwanên Şoreşger, partiyên siyasî, Rêxistinên Civaka Demokratîk, Kombûna Jinan a Zenûbiya, Hêzên Ewlekariya Hundirîn û Meclisa Leşkerî ya Tebqayê berê xwe goristana şehîdan a Tebqayê.

Li goristanê, cîgira hevserokatiya Meclisa Rêveber a kantona Tebqa Fatme Salih axivî û got: "Şehîd Hakî Karer em fêr kirin ku nirx nayê kirîn û rûmet nayê dayîn, lê bi fedakarî û berdêlên giranbiha tê standin. Şehîd Hakî Karer şehîdê gotin û helwestê bû û wê di bîra welat û dilên nifşa nû de zindî bimeîne. Em soza ya şopandina rêça şehîdan nû dikin."

Dûre hevserokê Meclisa Malbatên Şehîdan a Efrîn û Şehba Îbrahîm Mihemed Reşîd axivî û got: "Roja şehîdbûna Hakî Karer bû roja şehîdên azadiyê ya tevgera rizgariya Kurdistanê. Şehîd Hakî bû sembola têkoşîn, fedakarî û rêya ronîkirina rêça têkoşeran li çiyayên azadiyê û tevahî qadên welat."

Piştî axaftinan mûm li ber wêneyên şehîd Hakî Karer, Alî Haydar Kaytan û Riza Altûn hatin pêxistin. Her wiha sînevîzyonek li ser fedakariyên şehîdên tevgear rizgariya Kurdistanê û şehîdên di oxira azadiyê de canê xwe daye hat pêşkêşkirin.

Di dawiyê de şêniyan li ser gorên şehîdan mûm pêxistin û diruşmên silavkirina fedakariyên şehîdan berz kirin û soza paratina destkeftiyên wan da.

REQA

Bi boneya 18’ê Gulanê, ku li gel tevgera azadiya Kurdistanê Roja Şehîdan e, xelkê kantona Reqayê şehîdên Reqa, Efrîn, Şehba û Minbicê yên di mehên Adar, Nîsan û Gulanê de şehîd bûne li Goristana şehîdên Hikumiyê bi bîr anîn û mûm li ser gorên şehîdan pêxistin.

Di çalakiyê de Desteya Malbatên Şehîdan, Kombûna Jinan a Zenûbiya, meclisên xwecihî, nûnerên ji saziyên sivîl, leşkerî û malbatên şehîdan amade bûn.

Di çalakiyê de endama Komîteya Rêxistinî ya Meclisa Malbatên Şehîdan a kantonê Menal Şêxo şehîdên meha Gulanê di serî de kadroyên tevgera azadiya Kurdistanê wekî şehîd Hakî Karer, Alî Haydar Kaytan û Riza Altûn bi bîr anîn.

Hevseroketiya Meclisa Rêveber a kantonê Zelîxe Ebdî axivî û diyar kir ku roja 18’ê Gulanê ku tê de fermandar Hakî Karer di 1977’an de şehîd bûye, ji bo her kesê di oxira azadiya gelan de canê xwe feda dike, bû sembolek.

Keça şehîd Ehmed Ebas, Yemame Ebas bi vê boneyê helbestek ji bo bibîranîna bavê xwe xwend.

Di dawiya çalakiyê de şêniyan mûm li ser gorên şehîdan pêxistin û soza domandina rêya wan dubare kir.

HELEB

Girêdayî mijarê, bi sedan xelkê taxên Şêxemqsûd û Eşrefiyê yên Helebê, nûnerên saziyên sivîl, partiyên siyasî û tevgerên jinan li Pakrewangeha Şehîdên Taxên Şêxmeqsûd û Eşrefiyê ya li herêma Şiqeyêf çalakiyek li dar xist.

Di çalakiyê de endamê Meclisa Malbatên Şehîdan Ehmed Ebdo şehîdên azadiyê yên Heleb, deverên Herêma Bakur û Rojhilatê Sûriyeyê û şehîdên gerîla ku di oxira parastina welat û rûmetê de canê xwe dane, bi bîr anîn.

Di dawiyê de mûm li ser gorên şehîdan hatin pêxistinê û diruşmên silavkirina fedakariyên şehîdan hatin berzkirin.

KOBANÊ

Meclisa Malbatên Şehîdan a kantona Firatê bi boneya 18’ê Gulanê (Roja Şehîdan) şehîd Hakî Karer û tevahî şehîdên tevgera azadiya Kurdistanê bi bîr anîn. Merasîm li hola Navenda Baqî Xido ya Çand û Hunerê ya bajarê Kobanê hat lidarxistin.

Merasîma bîranîn bi deqeyek rêzgirtin dest pê kir, piştê dayîkên gerîla bi cil û bergên xwe yên Kurdî û wêneyên Rêber Abdullah Ocalan û yên Şehîd Alî Haydar Kaytan û Riza Altûn di destê wan de bûn derbasî hundir bûn.

Di merasîmê de endamên saziyan û şênî beşdar bûn. Her wiha endamê Komîteya Lihevanînê ya Meclisa Malbatên Şehîdan a kantona Firatê Ismet Şêxo axivî û diyar kir ku îro Roja Şehîdan û roja pêşengên PKK’ê ye. Di vê rojê de fermandar, Hakî Karer û hevrêyên din şehîd bûn.

Berdevka Însiyatîfa Gel a Azadiya Rêber Abdullah Ocalan a Kantona Firatê Eyşe Efendî diyar kir ku dayîkên gerîla pêşengên azadiyê anîn vê dunyayê, li kêlek zarokên xwe xebat meşandin.

Yek ji şahidê berxwedana Zîndana Amedê Hesen Karaxolan qala çîroka têkoşîn û berxwedana di zinadanê de kir û diyar kir ku berxwedana Zîndana Amedê de berxwedana aştî û demokrasî û heta kêliya dawiyê têkoşîn û berxwedana zîndanê hat meşandin.

Piştre li ser têkoşîn û berxwedana Zîndana Amed û têkoşîna gerîlayan, weke têkoşîna şehîd Alî Haydar Kaytan û Riza Altîn sînevîzyonek hat pêşkêşkirin.

Merasîm bi diruşma "Berxwedan jiyan e", "Bê Serok Jiyan Nabe" bi dawî bû.

ŞEDADÊ

Li bajarê Şedadê jî bi beşdariya endamên saziyên sivîl, komîte û partiyên siyasî, ji bo bibîranîna şehîdan, mûm li ser gorên şehîdan hatin pêxistin.

 (ekîb/fr)

ANHA