Di pîrozbahiyên Ekîto de peyamên siyasî hatin dayîn 

Partiya Yekitiya Suryan li gundê Demxiya Mezin yê Qamişlo û gundê Girê Şêran ê Tirbespiyê cejna Ekîto pîroz kirin.

QAMIŞLO

Li gundê Demxiya Mezin ê bajarê Qamişlo pîrozbahî bi deqeyekê rêzgirtinê dest pê kir. Piştî wê Koma Keşaf a Komeleya Çandî ya Suryan derketin ser dikê. Her wiha pêşangehek ku padîşah û şahbanû wekî sembolên mîrata Suryanî nîşan didin, pêşkêş kirin.

Piştî wê Hevserokê Partiya Yekitiya Suryan a Sûriyeyê Senherîb Bersûm axivî û got:" Mafên neteweyî, ziman û çandî bingehê têkoşînê ne. Divê mafên neteweyî, ziman û çandî yên gelê Suryan di destûrê Sûriyeyê de fermî bibin. Her wiha Sûriyê li ser bingehê demokrasî û pirrengî ku hemû pêkhate tev li bibin, were ava kirin".

Piştî axavtina Senherîb Barsûm Koma Yersûsa derket ser dikê û hunerên xwe pêşkêş kir.

Di berdewama pîrozbahiyê de Hevseroka Meclisa Sûriya Demokratîk (MSD) Leyla Qereman gelê Aşûr, Keldan û Suryan pîroz kir, cejna Ekîto sembola nûbûnê nirxand û got ku girînge hemû pêkhateyên Sûriyeyê bi hev re Sûriyê ava bikin û mafên hemû pêkhateyan werin dayîn. Leyla Qehreman diyar kir ku aramî li Sûriyeyê bi danûstandin, lihevkirin û beşdarbûna hemû hêzan ve girêdayî ye. Bi taybet divê rola jin di avakirina welat de sereke be".

Piştî wê Koma Yersûsa a biçûk û mezinan derketin dikê. Her wiha bi navê Komeleya Çand a Suryanî Besam Îşo helbestek xwend.

Koma Bermaya ya Suryan dîlan pêşkêş kirin. Pîrozbahî bi awazên Hunermend Hovik, muzîsyan Zinar Resûl û govend gerandinê bi dawî bû.

TIRBESPIYÊ

Pîrozbahiya cejna Ekîto li gundê Girê Şêran ê Tirbespiyê bi deqeyekê rêzgirtinê dest pê kir. Piştî Koma El Keşafa ya muzîkê Hevseroka Partiya Yekitiya Suryan a Sûriyeyê Şahmîran Danho axivî û got:" Herêm bi çand û yekitiya hemû pêkhateyan dewlemende. Divê hemû pêkhate bihevre welat ava bikin".

Şahmîran got ku hikûmeta demkî ya Sûriyeyê gelê Suryan paşguh dike û wiha got:"Bi roxmî gelê Suryan di şoreşa Sûriyeyê de bi partiyên dîtir re ji bo Sûriyeya demokratîk têkoşîn kirin lê belê mixabin hîna hikûmeta demkî ya Sûriyeyê gelê Suryan paşguh dike. Em dixwazin ku hemû pêkhateyên Sûriyeyê cihê xwe di nivîsandina destûra Sûriyeyê de bigrin. Azadî, edalet û wekhevî ji bo hemû gelên Sûriyeyê were dayîn".

Piştî wê peyamên pîrozbahiyê ya Parêzgarê Hesekê Nûredîn Ehmed û partiyên siyasî yên Kurd hatin xwendin. Di dawiya şahiyê de koma Lamîta ya girêdayî Komeleya Çandî ya Suryanî derket dikê, awaz û helperkên Suryanî pêşkêş kirin.

(np)

ANHA