Dewreyeke perwerdê bi navê Şehîd Xedîce Ebas hat vekirin

Meclisa Kombûna Jinan a Zenûbiya ya kantona Dêrazorê dewreyeke perwerdeyê ya jinan li Akademiya Şehîd Xedîce ya li gundê Keber ê rojavayê Dêrazorê vekir.

Nûnerên Rêveberiya Xweseriya Demokratîk a kantona Dêrazorê, endamên Meclisa Kombûna Jinan a Zenbûya, endamên Hêzên Ewlekariya Hundirîn û Hêzên Sûriya Demokratîk (QSD) tev li merasîma vekirinê bûn.

Meclisê di merasîmê de ragihand ku ji bo bîranîna şehîd Xedîce Ebas ku endama Hêzên Ewlekariya Hundirîn bû û di êrişa şaneyên DAIŞ`ê li ser rêya Ebû Xeşeb ê rojavayê Dêrazorê de şehîd bûbû, akademî bi navê wê hat vekirin.

Endama Hêzên Ewlekariya Hundirîn-Jin Îkram Mihemed axivî û got: "Şehîd Xedîce di rêya azadiyê û wekheviyê de şehîd bû. Hevalên wê hîna li ser şopa wê têkoşînê dikin. Ji bo bidestxistina armancên şehîdan, fedakariyên mezin dikin."

Endama Nivîsgeha Perwerdeyê ya Meclisa Kombûna Jinan a Zenûbiya Meryem Osman jî got: "Jin li hember pergala dijberî xwe şerekî mezin dimeşînin. Gelek destkeftî li Herêma Bakur û Rojhilatê Sûriyeyê bi dest xistin. Berxwedana wan li seranserî cîhanê deng veda."

Hevseroka Meclisa Rêveber a Rêveberiya Xweseriya Demokratîk a kantona Dêrazorê Şehnaz El Hefel jî destnîşan kir ku şoreşa jin pêşengiya wê dike, ti carî nayê paşguhkirin.

(şx)

ANHA