Destên Kesk: Însiyatîfa mirovî ya alîkariya koçberan

Li Rojava Ji ber gefên li ser herêmê û pirsgirêkên mirovî yên ji ber pêla mezin a koçberiyê ya ji Efrîn, Şehba û taxên Şêxmeqsûd û Eşrefiyê derketin, seferberiya giştî hatiye ragihandin.

Bi armanca alîkariya koçberan gelek însiyatîfên civakî ji aliyê şêniyên li herêmê û hem jî ji derve derketin.

Yek ji wan însiyatîfan Koma Eyad El Xedara (Destên Kesk) a li bajarê Tirbespiyê ye.  Însiyatîf ji aliyê ciwanên Tirbespiyê hatiye avakirin ku bi awayekî xwebexş hemû cûreyên alîkariyê pêşkêşî koçberên li bajar û gundan dikin.

Endamên Koma Destên Kesk, xwe wek koman bi rêxistin kirine. Her komeke bi karekî ve eleqedar dibe: Komek rojane xwarinê amade dikin û li koçberan belav dike, komeke din pisporê desteka dirûnî ye ku bi zarokên koçberan re eleqedar dibe, komek jî pêdiviyên kel û pelên malê (Cil, xwarin û hwd) li koçberan belav dike.

Yek ji damezrînerên Koma Destên Kesk Rojda Şefî Îbrahîm diyar kir ku însiyatîf berî vê krîza dawîn bi navê Keziyên Kesk hebû û ev agahî da ’’ Keziyê Kesk bi kar û barên jîngehê eleqedar dibûn. Lê piştî pêla mezin a koçberiyê, me biryar da ku navê wê veguherînin Destên Kesk û karê xwe ber bi xebata mirovî û alîkariya koçberan araste bikin."  

Rojda Îbrahîm da zanîn hemû beşdarên vê înîsiyatîfê tevî şêniyên bajêr, xwebexşên ji komele û rêxistinên mirovî ne, ku di nav tîmên rêxistinkirî de dixebitin da ku hejmara malbatên koçber çi li bajar be an jî li gundan bihejmêrin û xwe bighînin wan û alîkariyian pêşkêşî wan bike.

Rojda destnîşan kir ku şêniyên herêmî yên li derveyî welat dijîn, alîkariyên madî dişînin û ew jî ji aliyê xwe ve pêşkêşî koçberan dikin. Rojda Îbrahîm diyar kir ku rihê hevgirtin û piştgiriya civakî di mercên wiha de kevirê bingehîn e.

(b)

ANHA