Daxuyaniya Mezlûm Ebdî û avakirina hikûmeta Lubnanê mijarên rojnameyên erebî bûn

Rojnameyên Erebî yên îro behsa daxuyaniya Fermandarê Giştî yê QSD`ê Mezlûm Ebdî û têkiliyên QSD`ê bi Heyet Tehrîr El Şam re kirin, her wiha der barê derengxistina avakirina hikûmeta Lubnanê de nivîsîn.

QSD`Ê "ALIYEK SÊYEMÎN" TAWANBAR DIKE KU DIXWZE DI NAVBERA WAN Û ŞAMÊ PEVÇÛNAN DERXÎNE

Rojnameya El Ereb a Londonê li ser daxuyaniyên Fermandarê Giştî yê QSD`ê Mezlûm Ebdî nivîsî. Rojnameyê nivîsî ku Ebdî ji ajansa ANHA`ê re  gotiye: "Aliyekî sêyemîn û hin aliyên herêmî û hin welat bi dijwarî hewl didin ku di navbera hêzên wî û "Rêveberiya Operasyonan" de şer derxînin. Ebdî anî ziman ku her kes bi vê yekê dizane û QSD, Heyet Tehrîr El Şam û hêzên navneteweyî dixwazin dikin ku diyalog û projeyek niştimanî hebe û şer venegere. "

Çavdêr di wê baweriyê de ne ku rêveberiya nû li Sûriyeyê naxwaze bikeve pevçûnekê bi QSD`ê re, ji ber ku dibîne ku ev yek dikare wê bike nava arîşeyeke bi civaka navdewletî re, bi taybetî Amerîkayê. Ji ber rêveberiya nû  di rewşeke hestiyar de ye û hîna jî ji bo rastkirina rewşa navxweyî gelek pirsgirêkên wê hene.

ELXELÎC: HIKÛMETEKE LIBNANÎ DI RÊ DE YE

Rojnameya El Xelîc di gotara xwe ya serekede behsa derengxistina avakirina hikûmeta Lubnanê kir û nivîsî: "Tirs hebû ku aloziyên siyasî derbikevin û rê li ber avakirina hikûmetê bigirin, ji ber agahiyên ku behsa dûrxistina pêkhateya Şîî dikirin, lê belê serokwezîrê destnîşankirî ev mijar çareser kir û piştrast kir ku ew naxwaze ti kesî dûr bixe yan jî bide aliyekî, ji ber ku pergala Lubnanê taybetmendiya xwe heye û tu aliyek dê nikaribe "vetoyê" li ser kesî ferz bike. Bi vî awayî dawî li van tirsan hat û tê texmînkirin ku avakirina hikûmetê hêsan be, lê tevî şêwir û danûstandinên ku Selam li gel bask û aliyên siyasî yên curbicur kirin û tevî ku her kesî ragihand ku ti şert û mercên wan di derbarê dabeşkirina postên wezîran de nînin, lê eşkere bû ku hinek alî hene ji bo hin postên wezîrtiyê bi dest bixin, zextê dikin. "

(k)