Cotkaran li hemberî buhayên genim bertek nîşan da

Wezareta Aborî û Pîşesaziyê ya hikumeta demkî buhayê genimê asta yekemîn ku herî baş e, diyar kir. Kîloyeke genim bi 33.5 sentan e (dolarek 139 lîreyê Sûriyeyê yê nû ye). Cotkarên herêma Bakur û Rojhilatê Sûriyeyê li hember vê yekê nerazîbûna xwe anî ser ziman.

Cotkarên herêma Aliyan a Çilaxayê diyar kir ku eger genim wisa erzan bidin, dê gelekî ziyanê bibînin û nema dikarin çandiniyê bikin.

Cotkar Zêdan Hisên ê ji gundê Ereb Şah got: “Hikumetê neheqî û zilm li me kir. Me tov, gubre, mazot hemû ji kîsê xwe kirîn û çandinî kir. Bi vî buhayî em gelekî ziyanê bibînin. Heke wisa be êdî gelekî zehmet e ku em çandiniyê bikin. Me hêvî dikir ku buha derdora 50 sentan be. Hek buhayê genim neyê zêdekirin cotkar genimê xwe nafiroşin û dê li malê depo bikin.”

Ciwan Temo yê ji bajarokê Abra îsal 600 donim genim çandiye û got: “Tov, gubre, derman, çinîn, çandin û veguhastinê gelekî biha ne. Em toneke gubre bi 615 dolaran dikirin, her deh donim em 13 dolaran derman lê dikin, lîtreyeke mazotê vê dawiyê bûbû 25 sent û dibe ku her 10 donim bi 75 dolaran biçînin. Cotkar dê gelekî ziyanê bibînin. Cotkaran ji ber buhayê genim ê erzan ne razî ne.”

Hecî Abdullah jî got: “Êdî em di çandiniyê de ziyanê dibînin. Tenê kîsekî ku em genim dixinê, bi 2 dolaran e. Buhayê ku diyar kirine têra me nake ku em deynên xwe bidin.”

(np)

ANHA