Çînê banga rawestandina êrişên li dijî keştiyan ên li Deryaya Sor kir

Çînê banga sînordarkirina êrişên li dijî keştiyên sivîl ên li Deryaya Sor kir. Ev bang piştî êrişên Hûsiyan ên li dijî keştiyên li Deryaya Sor û êrişên hêzên Amerîka û Brîtanyayê yên li Yemenê hat kirin.

Ji ber êrişan gelek şîrketên veguhastinê naxwazin di rêya sereke ya bazirganiyê re derbas bibin û berê xwe da rêya Afrîkaya Başûr.

Berdevka Wezareta Karên Derve ya Çînê Mao Ning banga sînordarkirina êrişên li dijî keştiyên sivîl ji bo misogerkirina veguhastinê û parastina pergala bazirganiyê ya cîhanê kir.

Endamê Nivîsgeha Siyasî ya tevgera Ensarullah Mihemed El Bixêtî ji rojnameya Ezvesta ya Rûsyayê re diyar kiribû ku tu metirsî li ser keştiyên Çîn û Rûsyayê li Deryaya Sor tune ne û gotibû: "Tevgera Ensarullah êrişî keştiyên Amerîka û Brîtanyayê yên li Deryaya Sor dike, lê belê tu metirsî li ser dewletên din, di serî de Rûsya û Çînê tune ne û pêvajoya veguhastinê li herêmê ewle ye."

El Bixêtî diyar kir ku Hûsî amade ne ji bo derbasbûna keştiyên Rûsya û Çînê di Deryaya Sor re garantor bin û piştrast kir ku ew ê tu carî rê nedin keştiyên Îsraîlê yan jî yên girêdayî wan û got: "Ensarullah naxwaze tu keştiyan desteser an jî noq bike. Erka me zêdekirina lêçûna aborî ya Îsraîlê ye ji bo ku komkujiya li Xezayê rawestîne."

(mh)