Çalakvanên Dirbêsiyê û Qamişlo "Danezana destûrî" red kir

Çalakvanên bajarê Dirbêsiyê û Qamişlo yên kantona Cizîrê li dijî "Danezana destûrî" ya desthilata Şamê derketin û banga misogerkirina mafên pêkhateyan kir. Çalakvanan komkujiya dewleta Tirk a dagirker a li dijî malbateke li Kobanê şermezar kir.

ROJANE

18 adar, 2025 17:14

NAVENDA NÛÇEYAN

Çalakvan, siyasetmedar û rewşenbîrên bajarê Dirbêsiyê yê kantona Cizîrê bi xwepêşandanekê nerazîbûna xwe li hemberî "Danezana destûrî" ya desthilata Şamê nîşan da.

Xwepêşandan li sûka navendî ya bajêr li dar ket û xwepêşandêran pankartên "Doza Kurdî doza xak û gel e" û "Bêyî çareserkirina pirsgirêka Kurd çareserî li Sûriyeyê nabe" hildan.

Xwepêşandêran komkujiya dewleta Tirk a dagirker a li dijî malbateke li bajarê Kobanê şermezar kir û bang li hemû beşên civakê kir ku sibe di çalakiyên xwepêşandanan de beşdar bin û banga misogerkirina mafên xwe di destûra Sûriyeyê de bikin.

QAMIŞLO

Di heman çarçoveyê de çalakvanên bajarê Qamişlo xwepêşandanek li kêleka Stadyûma Şehîdên 12'ê Adarê ya bajarê Qamişlo li dar xist. Xwepêşandêran pankartên wekî "Destûra demkî nûnertiya me nake", "Nêrîna me Sûriyeya demokratîk, nenavendî, pirreng û siyasî ye" û "Danezana destûrî darvekirina demokrasiyê ye" hildan.

Xwepêşandêr ber bi navenda Komîseriya Neteweyên Yekbûyî ya (NY) ya taxa Siyahî ve bi rê ketin û li wir pankartên xwe li ber deriyê navendê daliqandin.

(mh/fr)

ANHA