Bi kêmbûna rêjeya ava Dîcleyê re gundên Êzîdî yên veşartî hatin vedîtin

Di rojên dawîn de ji ber kêmbûna rêjeya ava çemê Dîcleyê, şûnwar û şopên gundên Êzîdî yên kevin ên ku di bin avê de mabûn hatin vedîtin. Ji wan gundan gundê Xêrava û Xankî yên navçeya Xankiyê. Di van gundan de jiyana civakî ya geş hatibû meşandin û tê de gelek perestgehên Êzîdî û avahiyên ku vedigerin gelek serdemên dîrokê hene. Ev jî kevnarî û reseniya civaka Êzîdî ya herêmê nîşan dide.

Ji avahiyên taybet ên ku heta niha hatine dîtin avahiya dibistana Xankî ye. Dibistan di navbera salên 1958 û 1959'an de hatiye vekirin û berî ku di bin avê de bimîne, vekirî bû.

 SEDEMA BINAVBÛNA DÎCLEYÊ

Di destpêka salên 80'yan de ev gund di encama projeyên hikumetê yên avakirina bendavan û projeyên din ên avê de, binav bûn. Di encama van projeyan e rêjeya avê li hin deveran zêde bû û gelek gund û bajarok di bin avê de man bê ku agahiyên wan deveran werin belgekirin û şûnwarên çandî û olî yên li wir werin parastin.

Lê ji gelek salan ve, ji ber rewşên hewayê û avakirina bendavan di xaka Tirkiyeyê de, rêjeya ava çemê Dîcleyê kêm bûye û bandoreke nerênî li jîngeh û jiyana aborî û kultûrî ya Başûrê Kurdistanê û Iraqê dike.

GIRÎNGIYA VÊ VEDÎTINÊ

Ev yek rê li ber dîroknas, lêkoler û şûnwarnasan vedike da ku hîn kûrtir kultûra Êzîdiyan û dîroka wan nas bikin. Ev jî balê dikişîne ser zehmetiyên belgekirina çandê hemwextî guhartinên jîngehî. Bûyereke wiha girîngiya belgekirina mîrasê û parastina wê nîşan dide.

Hemwextî kêmbûna avê ya berdewam, tê pêşbînkirin ku cihên din werin vedîtin û wêneyeke zelaltir ji dîroka berî dehsalan diyar bibe.

(mh)

ANHA