Bi boneya salvegera Şoreşa ′Jin Jiyan Azadî′ banga greva giştî hat kirin

Partiyên siyasî yên Rojhilatê Kurdistanê, rêkxistinên civaka sivîl û parêzerên mafên mirovan bi boneya 2’yemîn salvegera Şoreşa ‘Jin Jiyan Azadî’ ya ji ber şehîdkirina Jîna Emînî ji aliyê “polîsên exlaqî” yên Îranê ve li seranserê Rojhilatê Kurdistan û Îranê hatibûn destpêkirin, banga greva giştî ya topyekûn kirin.

Di vê çaroveyê de gelek kom, rêxistinan bi dayîna daxuyaniyan beşdarbûna xwe ya di greva giştî de ragihandin û banga mezinkirina grevê kirin.

Dayikên Dadperwerên Kurdistanê bi daxuyaniyekê piştgiriya xwe ji bo banga greva giştî nîşan dan û gotin; “Em piştgiriya xwe ji banga destpêkirina greva giştî re nîşan didin. Di vê çarçoveyê de em jî bang li hemû malbatan dikin ku hevdu hembêz bikin û biçin ser gorên hezkiriyên xwe. Em bang li gelê Kurd dikin ku di 16’ê Îlonê de li malên xwe bin, neçin ser kar, dikan û bazaran bigirin.”

Her wisa 20 rêxistin û saziyên civaka sivîl bi daxuyaniyeke hevpar piştgiriya xwe ya ji bo greva giştî anîn ziman û tekez kirin ku ji roja qetilkirina Jîna Emînî ve binpêkirin, girtin, îşkence û zext li Rojhilatê Kurdistan û Îranê zêde bûne. Di daxuyaniyê de gotin; “Tevî nerazîbûnên navnetewî jî, dewleta Îranê zextên li ser Kurdan û li dijî dengên nerazî didomîne. Em bang li hemû beşên civaka Îranî û Kurdistanê dikin ku bi helwesteke sivîl û aştiyane beşdarî greva giştî bibin. Her wiha em bang li civaka navnetewî dikin ku zêdetir bala xwe bidin ser binpêkirinên mafên mirovan yên li dijî Kurdan li Îranê tên kirin.”