Bawernameyên zimanê kurdî li 110 xwendekaran hatin belavkirin

Ji herêmên kantona Cizîrê 110 xwendekaran ku li gorî 10 koman kursên asta yekemîn a zaravayê kurmancî bi dawî kir, îro bi şahiyekê bawernameyên xwe wergirtin.

Şahî li Navenda Çand û Hunerê ya Mihemed Şêxo ya Qamişloyê ji aliyê Saziya Zimanê Kurdî (SZK) û Navenda Çîbicîkar a Perwerdeyê ve hat lidarxistin. Di şahiyê de endam û rêveberên SZK’ê, xwendekar û malbatên wan, hejmarek rewşenbîr û kesên bi ziman eleqedar dibin bi cil û bergên xwe yên kurdî beşdarî şahiyê bûn.

Şahiyê bi rêzgirtin dest pê kir. Piştre hevseroka SZK’ê Viyan Hesen xwendekar pîroz kirin û anî ziman ku ew bi derçûna wan serbilind in.

Viyan Hesen girîngiya fêrbûna bi zimanê dayikê vegot û parastina ziman wek beşeke parastina nasname û çanda neteweyan bi nav kir. 

Hevseroka Meclisa Rêveber a Rêveberiya Xweser a Kantona Cizîrê Vîviyan Beho Osê jî xwendekar pîroz kirin û anî ziman ku ziman nasnameya gelan e û fêrbûna bi zimanê dayikê mafekî rewa yê her neteweyekê ye.

Piştî axaftinan li ser zimanê kurdî pêşbirkek hat lidarxistin. Paşê bawername li xwendekaran hatin belavkirin. Şahî bi stran û govendê bi dawî bû.

(ah/b)

ANHA