Cenazeyên 2 şehîdan bi merasîmekê hatin veşartin
Şehîd Cemîl Nasan û şehîd Îsmaîl Hesen bi merasîmekê bi heybet hatin oxirkirin.
Endamên Hêzên Têkoşîna Li Dijî Madeyên Hişbir Cemîl Nasan û Îsamîl Hesen 8′ê Cotmehê di êrişa hewayî ya dewleta Tirk a dagirker de li gundewarê Dêrikê şehîd bûn. Şêniyên kantona Efrîn û Şehbayê cenazeyên her du şehîdan ji Nexweşxaneya Avrîn a navçeya Fafînê wergirtin û bi berî dan Goristana Şehîdên Berxwedana Serdemê ya li navçeya Ehizê ya Şehbayê.
Li goristanê merasîmek hat lidarxistin. Rêvebera Meclisa Malbatên Şehîdan Şaziya Îbrahîm sersaxî ji malbatên şehîdan û tevahî gelên Bakur û Rojhilatê Sûriyeyê re xwest û rola şehîdan a parastina destkeftiyên şoreşê û ewlehiya herêmê vegot.
Endamê Meclisa Kantona Efrîn û Şehbayê Dilsoz Efrîn bal kişand ku plana dewleta Tirk a dagirker koçberkirina gelê Kurd û dagirkirina qadek mezintir e.
Dilsoz Efrîn îşaret bi durûtiya Erdogan jî kir û got: "Erdogan li pêşberî çapemeniyê hevxemiya xwe ji bo zarokên Filistînê radigihîne û dibêje ku herêm bi tîbûnê re rû bi rû ye, lê li Bakur û Rojhilatê Sûriyeyê sûcên herî hov dike, binesaziya herêmê dike armanc, avê qut dike, zeviyên çandiniyê dişewitîne, zarok û kesên bi temamî bi hovîtî qetil dike."
Ji fermandarên Hêzên Ewlekariya Hundirîn Hikmet Reşîd sersaxî ji malbatên şehîdan re xwest û got ew ê têkoşînê berdewam bikin heta Efrîn û hemû deverên dagirkirî rizgar bikin.
Endama Komîteya Perwerdeya Civaka Demokratîk Rûken Ehmed wesîqeyên şehadetê yên her du şehîdan xwendin û radestî malbatên wan kirin. Cenazeyên şehîdan bi dirûşmên "Şehîd namirin" hatin veşartin.
(bb)
ANHA