Xelkê herêma Firatê sersaxî da malbatên şehîd Elî Osman û Orhan Miho
Bi sedan şêniyên herêma Firatê sersaxî da malbatên şehîdên Hêzên Têkoşîna dijî Madeyên Hişbir Elî Mihemed Osman û Orhan Hisên Miho ku di bombebarana dewleta Tirk a dagirker a dijî herêma Dêrikê de şehîd bibûn.
Meclisa malbata Şehîdan a Herêma Firatê ji bo 2 şehîdên Hêzên Têkoşîna Dijî Madeyên Hişbir Elî Mihemed Osman û Orhan Hisên Miho yên ku di êrişa dewleta Tirk a dagirker a 9`ê Cotmehê de şehîd bibûn, merasîma sersaxiyê li dar xist.
Konê sersaxiyê li Qada Şehîd Egîd a li bajarê Kobanê hat vedan û bi sedan şêniyên bajêr, endamên saziyan û Hêzên Ewlekariya Hundirîn beşdarî merasîmê bûn.
Li bin kon, wêneyên şehîdan û wêneyên Rêber Abdullah Ocalan hatin daliqandin.
Piştî rêzgirtinê, Hevserokê Desteya Hundirîn a Herêma Firatê Bozan Xelîl axivî. Bozan sersaxî ji malbatên şehîdan re xwest û bal kişand ser êrişên dijwar ên dewleta Tirk a dagirker.
Ji endamên rêveberiya Kongra Star a herêma Firatê Macîde Hiso jî axivî. Macîda sersaxî ji malbatên 29 şehîdên êrişa 9`ê Cotmehê re xwest û got: “Şehîdan ji bo azadiya gelê Kurdistanê canê xwe feda kir. Em dizanin ku em di meha komployê de ne. Ev êriş jî berdewama komployê ye. Lê em heta dawiyê têbikoşin.”
Li ser navê partiyên siyasî jî endamê Komîteya Navendî ya Partiya Demokrat a Kurdî ya Sûrî (PDKS) Gêlo Îsa axivî û sersaxî da malbatên şehîdan. Îsa diyar kir ku herêm di qonaxeke hestiyar re derbas dibe û got: “Em ê ji bo azadiya gelê xwe her li hember diminan têbikoşin.”
Merasîma sersaxiyê bi dirûşmeyên “Şehîd Namirin” bi dawî bû.
ANHA