Xelkê Hesekê ji bo tecrîdê meşiyan

Di çarçoveya çalakiyên Însiyatîfa Gel a Herêma Cizîrê 9`ê Îlonê bi dirûşma “Azadiya Rêber Apo misogeriya aştiya li Rojhilata Navîn e” daye destpêkirin de xelkê navçeyên Til Temir û Zirganê yên kantona Hesekê meşek li dar xist.

Meş bi beşdariya pêkhateyên Kurd, Ereb, Suryan û Asûr ji pêşiya avahiya Meclisa Malbatên Şehîdan a Til Temirê  dest pê kir.

Meş li dawiya kolana Omer Beravî rawestî û veguherî mîtîngê. Di mîtîngê de, endama Rêveberiya Kongra Star a Til Temirê Madlên El Ubêd axivî û tecrîda li ser Rêber Abdullah Ocalan şermezar kir. Medlên wiha domand: “Rêber Abdullah Ocalan bi fikrên xwe planek ji bo pêşeroja tevahî mirovaniyê danî û di fikrên xwe de tu cudahî nexist navbera etnîk, netewe û mezhebekê. Lê dewletên mêtinger, dixwazin Rojhilata Navîn wisa parçekirî bimîne da ku bikare wê kontrol bike.”

Medlên got projeya neteweya demokratîk ji bo tevahî dewletên demokratîk a herî baş e, ji ber wê dewletên dijberî fikrên Rêber Abdullah Ocalan û projeya Rêveberiya Xweser dixwazin bi tevahî rêbazên darbe li vê projeyê bidin.

Medlên bang li rêxistinên hiqûqî, mirovî kir ku têkildarî doza Rêber Abdullah Ocalan tev bigerin û der barê tecrîda li Îmraliyê de dest bi lêpirsînekê bikin.

Endama Meclisa Navçeya Til Temirê Semah Hemadî jî bal kişand ser rola Rêber Abdullah Ocalan di bidestxistina azadiya jinan de û got: “Bi saya fikir û felsefeya Rêbertî, tevahî gel li hember cureyên cudakirina gelan, piştgiriya hev dikin.”

Di dawiya meşê de, beşdaran berxwedana Rêber Abdullah Ocalan silav kir.

(şx)

ANHA