Ji bo azadiya fîzîkî ya Rêber Abdullah Ocalan meşeke meşaleyî

Yekitiya Jinên Ciwan a Tebqayê ji bo azadiya fîzîkî ya Rêber Abdullah Ocalan meşek bi meşaleyan li dar xist.

Nûnerên Rêveberiya Sivîl, partiyên siyasî, tevgerên jin û ciwanan jî di nav de, bi sedan şêniyên Tebqayê ji taxa Ewel dest bi meşê kir. Di meşê de posterên Rêber Abdullah Ocalan, alên Yekitiya Jinên Ciwan û Tevgera Ciwanên Şoreşger a Sûriyeyê hatin hildan. Her wiha pankartên "Bi Jin, Jiyan, Azadî re serbixe azadî" hatin vekirin. Meş li ber avahiya Yekitiya Xwendekarên Demokrat veguherî mîtîngê û deqeyeke rêz hat girtin.

Piştre endama rêveberiya Yekitiya Jinên Ciwan Aya Silêman axivî, bal kişand ser êrişên dewleta Tirk a dagirker ên li ser Bakur û Rojhilatê Sûriyeyê û Herêmên Parastinê yên Medyayê û got, dewleta Tirk bi van êrişan dixwaze îradeya gelên azadîxwaz bişkîne.

Aya Silêman li ser tecrîdkirina Rêber Abdullah Ocalan û nameyên gefxwarinê ku dewleta Tirk ji Rêber Abdullah Ocalan re şandine û wiha domand: "Her kes dizane dewleta Tirk û çeteyên wê nameyên gefxwarinê ji Rêber Apo re şandin. Êdî armanca dewleta Tirk a dagirker û dewletên kapîtalîst ji her kesî re aşkere ne ku dixwazin gelan tune bikin. Lê fikr û felsefeya Rêber Abdullah Ocalan ji tevahî pirsgirêkên asêmayî yên Rojhilata Navîn re çareserî ye, her wiha rêya xilaskirina civakan ji zihniyeta desthilatdar û koledariyê ya dewletê ye."

Aya Silêman anî ziman ku Rêbertî girtîgeha Îmraliyê veguherandiye dibistaneke fikrî, serî ji dewletên kapîtalîst re xwar nekir û ramanê wî li tevahî cîhanê belav bû.

Aya destnîşan kir ku êrişên dagirkeran ên li ser gerîlayan bi bin ketin û da zanîn ku gerîla îradeya xwe ji ramanê Rêber Abdullah Ocalan girtiye û ev îrade ji dîroka dewleta Tirk a dagirker mezintir e.

Aya Sêlman got, ew ê xeta şehîdan dişopînin, destkeftiyên bi saya şehîdan hatine bidestxistin biparêzin da azadiya fîzîkî ya Rêber Abdullah Ocalan pêk were herêmên dagirkirî werin rizgarkirin.

(bb)

ANHA