Di Mîhrîcana Zarokan de reseniya çanda gelên herêmê

Mîhrîcana 8`emîn a Zarokan bi dirûşma “Zarok keziyên hûnandî yên azadiyê ne” 1′ê Îlonê li bajarokê Rimêlanê dest pê kir. Di mîhrîcana îsal de komên hunerî yên Kurd, Ereb û Suryan ji tevahî bajar û navçeyên kantona Qamişloyê beşdar bûn.

Ji komên ku beşdarî mîhrîcanê bûne, koma govendê ya Lamîta ya Dar Tûma Nehriyo ya Zarokên Suryan a ji navçeya Tirbespiyê bû. Têkildarî wê, endama rêveberiya Komeleya Çanda Suryan Pîrola Yusif got: “Îsal me xwest çanda Suryan vejînin. Pêkhateyên herêmê bi paşguhkirinê rû bi rû bûn, lê ev mîhrîcan bû wesîleyek ku pêkhate çanda xwe pêşan bidin.”

Pîrola wiha domand: “Îsal mîhrîcan balkêş bû ku ji tevahî bajar û navçeyên kantona Qamişloyê, kom amade bûn. Ev xwişk û biratiya gelan a li herêmê nîşan dide û destnîşan dike ku ji bo parastina civaka xwe divê em bibin yek û vê yekitiyê berdewam bikin. Mîhrîcan firsendeke ku çandên herêmê ji tunebûnê biparêzin. Em spasiya tevahî beşdaran dikin.”

Di mîhrîcana îsal de, Koma Esalêt El Badiye (Reseniya Beyarê) ji navçeya Til Hemîs û Koma Şanoyê ya Til Hemîsê beşdar bû. Endama Rêveberiya Navenda Çandê ya Til Hemîsê Muna Xilêwî got komên beşdar ên Til Hemîsê hewl dan ku çanda resen a Ereb a herêma xwe nîşan bidin û wiha pê de çû: “Tevlêbûna tevahî pêkhateyan û pêşandana çanda xwe, hişt ku ev mîhrîcan cuda be.”

Muna diyar kir ku li gel şer, dorpêç û hewldanên têkbirina ewlehiya herêmê, mîhrîcan li dar ket û zarokan bi tevlêbûna xwe bersiv da wan hewldanan û yekitiya gelên herêmê nîşan da.

Muna wiha di dawiyê de axivî: “Xebatên ji bo pêşxistina behreyên zarokan berdewam in. Bi hêvî me ku di mîhrîcanên bê de tevlêbûn xurttirk be.”

(şx)

ANHA