Şêniyên Hesekê însiyatîfên ava vexwarinê silav kirin

Ji dema dagirkirina Serêkaniyê de ji aliyê dewleta Tirk a dagirker û çeteyên wê ve, şêniyên bajarê Hesekê ji ber kirîza avê gelek zehmetiyan dikişînin.

Gerînendetiya Avê ya Hesekê di 3'yê Tîrmehê de bajarê Hesekê wek devereke wêranbûyî ragihand û piştî vê ragihandinê însiyatîfên mirovî û eşîrî ji bo destekdayîna şêniyên Hesekê û şandina avê ji wan re dest pê kirin, nexasim hemwextî germahiya zêde û qutkirina ava stasyona Elokê.

310 sahrîcên avê li ser 6 qonaxan gihîştin Hesekê û li taxên bajêr hatin belavkirin.

Girêdayî vê mijarê, welatiya bi navê Fatme El Ubêd a ji taxa Mişêrfe ya Hesekê siyasetên dewleta Tirk a dagirker şermezar kirin û got: "Em bang dikin ku av ji bo Hesekê bê berdan nexasim di vê germahiya zêde de."

Fatme însiyatîfên destekdayînê silav kirin û hêvî kir ku ev însiyatîf bidomin û av bigihîje hemû taxên bajêr.

Welatiya bi navê Xatar El Ehmed a ji taxa Mişêrfe jî wiha axivî: "Kiryarên Tirkiyeyê dermirovî ne, av para hemiyan e û nabe bê qutkirin."

Di dawiya axaftina xwe de Xatar got: "Em ji bo însiyatîfên eşîran û yên Rêveberiya Xweser ên belavkirina avê spasdar in."

Her wiha, Xedîce Sîno ya ji taxa Mişêrfe ev însiyatîf û organîzekerên wan spas kir û destnîşan kir ku însiyatîfên wiha nîşana hevgirtin û ruhê berpirsiyariyê ya li Bakur û Rojhilatê Sûriyeyê ne.

(mh/şx)

ANHA