Iraqê têkiliyên dîplomatîk bi Swêdê re qut kirin

Bi sedan xwepêşandêrên iraqî di saetên siharê de êrişî Balyozxaneya Swêdê ya li navarasta Bexdayê kir û agir pê xist. Piştî şewitandina Quranê li Swêdê ku ev cara duyemîn di hefteyên dawîn de rû dide û ji ber agahiyên li ser şewitandina ala Iraqê, Muqteda El Sedr banga xwepêşandanan kir.

Hikumeta Swêdê îro ji ber şewitandina balyozxaneya wê ya li Bexdayê gazî berpirsê kar û barên Iraqê kir û got ku şewitandina balyozxaneyê “qet nayê qebûlkirin”. Swêdê her wiha Iraq bi nepêkanîna erka xwe ya parastina şandeyên dîplomatîk û karmendên wan tawanbar kir.

Têkildarî mijarê, îro hikumeta Iraqê bi serokatiya serokwezîr Mihemed Şiya Sûdanî civîneke awarte li dar xist û daxuyaniyek da. Di daxuyaniyê de hat gotin ku wan roja çarşemê bi rêyên dîplomatîk hikumeta Swêdê agahdar kiriye ku eger şewitandina Quranê li ser axa dubare bibe û bi bihaneya azadiya derbirandinê destûra wê yekê bê dayîn, ew ê têkiliyên xwe yên dîplomatîk qut bikin.

Iraqê ev kiryar wek “provaksayon û heqareta li prensîb û mîsaqên navnetweyî yên têkildarî rêzgirtina li hember ol û baweriyan, xeteriyê li ser aştiyê çêdikin, çanda kîn û tundiyê teşwîq dikin” bi nav kirin.

Serokê Meclisa Wezîran a Iraqê ji Wezareta Karên Derve xwest berpirsê kar û barên Iraqê ji balyozxaneya Iraqê ya li Stokholmê vekişiye û ji balyoza Swêdê ya li Bexdayê jî xwest ji axa Iraqê derkeve.

(c)