​​​​​​​Piştî hilbijartinan nirxê lîreyê Tirk dadikeve

Li Tirkiyeyê roja Yekşemê tûra duyemîn a hilbijartinên serokkomariyê çêbû. Piştî ku hate eşkerekirin Recep Tayyîp Erdogan bi ser ketiye, lîreyê Tirk di asteke dîrokî de bê qîmet bû û dolarek bû zêdetirî 20 lîreyî.

Erdogan di axaftina xwe ya piştî hilbijartinê de got dê polîtîkayên xwe yên heta niha, ji niha û pê ve jî bidomîne.

Ajansên navneteweyî têkildarî mijarê destnîşan kir ku encamên gavên ji bo zêdekirina mûçeyan ên li dijî enflasyona bilind a li Tirkiyeyê yên beriya hilbijartinê, dê piştî hilbijartinê diyar bibin.

Ji fîrmaya Tellimer a li Îmaratê Hasnaîn Malîk li ser mijarê got: "Hilbijartina Erdogan derfeta razemeniyê nade tu sermayeya biyanî. Di rêyeke krîzê ya giran de ku bandorê li sermayeyê dike; enflasyon gelekî bilind e, rêjeya faîzê gelekî nizm e û rezervên dowîzê jî qet nîn in.”

Aborînasê ji DYA'yê Roger Mark jî hişyarî da ku krîza hevsengiya dayînan a li Tirkiyeyê dibe ku kûr bibe û kontrola sermayeyê zêde bibe û got: "Eger polîtîka neyê guhertin, Tirkiye ber bi krîzeke dayînê ya di asteke bilind de diçe; dibe ku kontrolên sermayeyê yên girantir zêde bibin. Ev rewş dibe ku bibe sedem mirov bi zorê dolar bike lîre; dibe ku Tirk nekarin deynê xwe yê derve bidin."