Sempozyuma Hunera Şêwekariyê dest pê kir

Di Sempozyuma 4′emîn a Hunera Şêwekariyê ya Kobanê de ku ji aliyê Desteya Çandê ya Herêma Firatê ve bi hevkariya Desteya Çand û Hunerê ya Bakur û Rojhilatê Sûriyeyê hatiye organîzekirin, 40 şêwekar amade bûn.

Di sempozyumê de hevserokê Meclisa Rêveber a Herêma Firatê Mihemed Şahîn axivî.

Şahîn wiha got: "Her kesê dixwaze xizmeta welatê xwe bike, divê behreya xwe bi pêş bixe. Huner ji bo pêşxistina civakên hewl didin xwe ji qeydên rejîmên destpot rizgar bikin û parastina nirxan girîng e. Şoreş bi çekê tenê bi ser nakeve, lê bi fikir û zanabûnê bi ser dikeve."

Şahîn wiha domand: "Erka her kesî ye li herêmê xwe bi zanabûnê xurt bike ku rewşên herêm tê re derbas dibe û şerê li dijî herêmê, derbas bike. Bi vê yekê dê şoreşa me bi ser bikeve û em ê bigihêjin armanca xwe û bi hev re welatê xwe ava bikin."

Li aliyekî din jî cîgira Heverokatiya Desteya Çand û Hunerê ya Bakur û Rojhilatê Sûriyeyê Ronahî Hesen wiha axivî: "Hunermend bi firçeyên xwe daxwazên civakan ên veşartî nîşan didin û jiyanê diafirînin."

Ronahî Hesen bang li hunermendan kir ku fikrên xwe belav bikin, ji ber ku di çavên hunermend de rastî heye, êş û hestên xwe bi rêya hunera xwe eşkere dikin.

Sempozyum dê heta 26′ê Gulanê dewam bike û piştre pêşangeha hunera şêwekariyê di 28′ê Gulanê de li Qamişloyê dest pê bike.

(fr)

ANHA