​​​​​​​Kurd û Ereb: Em ê bi hev re azadiya fîzîkî ya Rêbertî pêk bînin

Desthilata dewleta Tirk ji 25 salan ve kiryarên derqanûn û dermirovî li dijî Rêber Abdullah Ocalan pêk tîne û tecrîdeke giran li ser wî ferz kiriye. Ji 25'ê Adara 2021'ê ve rê nade parêzer û malbata wî ku hevdîtinê pê re bikin.

Pêkhateyên Kurd û Ereb ên navçeya Çilaxa ya kantona Qamişloyê tecrîda girankirî ya li ser Rêber Abdullah Ocalan şermezar kir û gotin, hevgirtina li hemberî siyasetên dagirkeran û dijminan rêya yekane ya pêkanîna azadiya fîzîkî ya Rêber Abdullah Ocalan e.

Şêxê Qebîleya Zubeydî ya Ereb Raxib Beşar El Faris bal kişand ser girîngiya xeta neteweya demokratîk û pêkanîna wê di pêvajoya Şoreşa Bakur û Rojhilatê Sûriyeyê de û got: "Şoreşa Bakur û Rojhilatê Sûriyeyê bi pirengiya pêkhateyan û yekitiya wan tê naskirin. Projeya neteweya demokratîk a ku Rêber Abdullah Ocalan pêşkêş kiriye ji bo tevahî gelên Rojhilata Navîn û cîhanê ye."

Şêx Raxib Beşar El Faris diyar kir ku ew ê xwedîderketina li fikr û felsefeya Rêber Abdullah Ocalan berdewam bikin û destnîşan kir ku fikrê Rêbertî çareseriya herî guncaw a ji bo avakirina Sûriyeke pirrengî ya demokratîk.

Şêx El Faris bang li tevahî pêkhateyan kir ku têkoşînê xurt bikin heta ku azadiya fîzîkî ya Rêber Abdullah Ocalan pêk were.

Welatiya bi navê Suheyla Şemo ya ji pêkhateya Kurd anî ziman ku bi derketina felsefeya neteweya demokratîk a Rêber Abdullah Ocalan re ked û têkoşîna hevpar xurt bûn û wiha domand: "Li ser vî esasê şêniyên Bakur û Rojhilatê Sûriyeyê ev fikr pejirandin û li hemberî êrişên qirkirin û asîmîlekirinê yên dagirker û dijminan şer kirin."

Suheyla Şemo bal kişand ser rola Rêber Abdullah Ocalan di pêşxstina têkoşîna jinan de jî û got: "Rêber Abdullah Ocalan cihekî girîng û roleke mezin di rêxistina civakê û rêvebirina eniyan de da jinan, ji ber ku bi hêz û têkoşîna jinan bawer e. Li ser vê yekê jinan dane ser xeta têkoşînê."

Suheleya bang li tevahî jinan kir ku li hemberî tecrîdê xwe bi rêxistin bikin û hevgirtina xwe xurt bikin.

Welatiyê bi navê Husam El Mubarek ê ji pêkhateyê Ereb jî da zanîn ku fikr û felsefeya Rêber Abdullah Ocalan rêya pêkhateyên Bakur û Rojhilatê Sûriyeyê ronî kir û pêkhateyan li ser xeta azadiyê toza zulm û koletiyê li ser xwe rakirin.

Welatiya bi navê Wehîda Sebrî ya Kurd destnîşan kir ku di Şoreşa Bakur û Rojhilatê Sûriyeyê de xwîna Kurd, Ereb, Suryan, Tirkmen û Asur tev li hev bû û li hemberî kesên ku hewl didin vê yekitiyê ji hev bixin, bû mertalekî asê.

Wehîda Sebrî bang li tevahî pêkhateyan kir ku xeta neteweya demokratîk pêk bînin û belav bikin û got: "Xwedîderketina li fikrê Rêber Abdullah Ocalan û rêxistinkirina civakê rêya azadiya fîzîkî ya Rêbertî ye. Hêz û rêxistinbûna civakê li hemberî tevahî siyasetên dijmin û dagirkeran bi ser dikevin."

(bb)

ANHA