Koçberên Efrînê Cejna Zimanê Kurdî pîroz kir

Bi boneya Cejna Ziman Kurdî ku 15`ê Gulanê ye, Desteya Perwerde û Fêrkirinê ya kantona Efrîn û Şehbayê şahiyek li qada Kampa Serdem a gundê Til Susin li dar xist. Bi sedan xwendekar, mamoste, nûnerên deste, saziyên girêdayî Rêveberiya Xweser tev li şahiyê bûn.

Di şahiyê de, hevserokê Desteya Perwerde û Fêrkirinê Zelûx Bekir axivî û Cejna Zimanê Kurdî li her kesî pîroz kir.

Zelûx hemû şehîdên di oxira vejandina zimanê Kurdî şehîd bûne, bi bîr anî û got: “Dewleta Tirk a dagirker bi hedefgirtina dibistanên gundên li eniyên şer, dixwaze tirsê di nava xwendekaran de belav bike. Hikumeta  Şamê jî dorpêçeke giran li kantonê ferz dike û nahêle pirtûk derbasî kantonê bibin. Ji bo ku nasnameya gelan biçewisîne û zimanê dayîkê tune bike.”

Zelûx destnîşan kir ku dewleta Tirk a dagirker li Efrînê fikrê toranî di nava xelkê wê de belav dike û li wan ferz dike ku zimanê Tirkî bixwînin.

Di dawiyê de Zelûx soza şopandina rêya şehîdan da ku di oxira vejandin û parastina zimanê dayîkê û li hember hêzên mêtingerên Kurdistanê tê koşiyan.

Di şahiyê de, bernameyên hunerî, helbest, şanoyek têkildarî fêrbûna zimanê kurdî hatin pêşandan.

Beşdaran li ber stranên şoreşgerî xelekên govendê gerandin.

(dm/şx)

ANHA