Bi sedan Qamişloyî berê xwe da konê sersaxiyê yê Raperîn Amed

Meclisa Malbatên Şehdan a Qamişloyê konê sersaxiyê ji endama Meclisa Serokatiya Kongra Gel Delal Ezîzoglu (Raperîn Amed) re li Goristana Şehîd Delîl Sarûxan veda. Raperîn Amed di encama êrişên artêşa Tirk a dagirker li dijî Herêmên Parastinê yên Medyayê de di 17′ê Hezîrana par de şehîd bûbû.

Di merasîmê de bi sedan şêniyên Qamişlo, navçeyên wê; Tirbespiyê, Til Hemîs, Til Birak û Amûdê, nûnerên ji partiyên siyasî, endamên sazî, meclis, Kongra Star, Kongreya Îslama Demokratîk û TEV-DEM′ê beşdar bûn.

Kon bi wêneyên şehîd Raperîn, wêneyên Rêber Abdullah Ocalan, alên Meclisa Malbatên Şehîdan, PKK′ê û HPG′ê hate daliqandin.

Her wiha beşdaran li dengê şehîd ê têkildaîr rastiyê jinê li Kurdistanê û pêwîstiya bilindkirina têkoşînê guhdar kir.

Piştî guhdarkirinê Hevseroka Meclisa Malbatên Şehîdan Qamişloyê Hêvî El Seyid şehîdên azadiyê bi bîr anîn.

Hêvî meha Adarê bi meha têkoşîn û berxwedanê bi nav kir, ji ber ku nîşaneya têkoşîna Kawa Hesinkar, Mezlûm Dogan û Raperîn Amed e û fedekariyên wan di oxira pêkanîna azadî ji civak û gelan re pîroz kir.

Hêvî di dawiyê de got divê têkoşîn ji bo parastina mîrasa têkoşîna van têkoşer û şehîdan were bilindkirin.

Li aliyekî din jî Hevseroka TEV-DEM′ê Rûken Ehmed axivî û got: "Şehîd Raperîn kesayeta jina azad temsîl kir. Ji ber ku roleke pêşeng di birêxistina civakê û perwerdekirina wê de ji bo pêkanîna fikir û felsefeya neteweya demokratîk de lîst."

Rûken da zanîn ku şehîd Raperîn rewşa gelan û rastiya dijmin ji aliyên hewl û berjewendiyên wan ve analîze kir. Ji lew re her tim hewl dide civakê têkildarî xweparastina ji van planên bi armanca qirkirina çandî, fikirî û fîzîkî ve hişyar bike.

Rûkenê gotineke şehîd Raperîn bi bîr xistin û wiha got: "Em dikarin bendên koletiyê yên li dijî civakan bişikînin, tenê ew yek bi rêxistinkirina civakî û zanakirinê pêkan e."

Rûken Ehmed wiha dawî li gotina xwe anî: "Şehîd Raperîn bi rêya têkoşîna xwe li tevahî qadan hezkirin û wefedariya xwe ji gel re temsîl kir."

Merasîm bi diruşên ′şehîd namirin′ bi dawî bû.

(fr)

ANHA