Beşa yekemîn ji Hêzên Operasiyonan a Minbicê der çû

Akademiya Şehîd Simko ya Hêzên Ewlekariya Hundirîn a Minbicê beşa yekemîn ji Hêzên Operasiyonan bi navê Dewreya Şehîd Hesen Xalid Osman bi dawî kir.

Di merasîmê de gelek efserên Hêzên Ewlekariya Hundirîn a Bakur û Rojhilatê Sûriyê, malbatên gelek derçûnan û malbatên şehîdan amade bûn.

Dewre 45 rojan dewam kir, tê de waneyên leşkerî, fikrî û siyasî hatin dayîn.

Di merasîmê de efserê Hêzên Operasiyonên Hêzên Ewlekariya Hundirîn a Minbicê Ebdulhemîd Şêxo axivî û wiha got: "Bi perwerde û xebatê em ê li hember hemû astengiyan bisekinin û derbas bikin, parastina ewlehî û îstîqrara li herêmê bikin. Bi her gavê re em ji armanca xwe ya pêkanîna aştiya gelê xwe nêz dibin."

Endama Rêveberiya Giştî ya Hêzên Ewlekariya Hundirîn, efser Sîdar Hesen derçûna beşa yekemîn ji Hêzên Operasiyonan li derçûn û şêniyên Minbicê pîroz kir û bang li hêzan kir ku rêya hevrêyên xwe yên şehîd bişopînin."

Di merasîmê de, li ser navê endamê Hêzên Ewlekariya Hundirîn Hesen Xalid Osman, xwişka hevjîna şehîd Sîpêle Îbrahîm axivî û îşaret bi girîngiya perwerdeyên leşkerî û fikrî kir, bi taybet di vê merheleyê de.

Merasîma derçûnê bi toraneke leşkerî û sondxwarina leşkerî bi dawî bû.

(fr)

ANHA