​​​​​​​Xwendekarên Til Temirê tevî êrişên dewleta Tirk jî israr dikin bixwînin

Xwendekarên navçeya Til Temirê ya Hesekê diyar kir ku êrişên domdar ên dagirkeriya Tirk ên li ser herêmê ji bo koçberkirina wan û tunekirina hebûna wan in. Xwendekaran diyar kir ku ew di temamkirina xwendinê de bi israr in û xaka xwe nahêlin û dê parastina wê bikin.

Xwendekara bi navê Sêvîn Heysem Îbrahîm têkildarî rewşa perwerdeyê ya li navçeyê ji ber topbarana ku hema rojane li wir tê kirin, wiha got: "Êriş li ser herêma me hene û çend dibistan tên topbarankirin, lê nikarin me ji çûna dibistanan bi dûr bixin."

Dawiya sala 2019’an de piştî dagirkirina herêma Serêkaniyê, dema ku artêşa Tirk a dagirker û çeteyên wê nêzî Til Temirê bûn, dibistanên navçeyê bi giştî bûn hedefa wan û di encamê de 9 dibistan wêran bûn.

Bi destpêkirina sala nû ya xwendinê ya 2022-2023`yan de ku di 18`ê Îlonê de li Bakur û Rojhilatê Sûriyê dest pê kir û tevî topbarana li ser Til Temir û gundewarên wê yên li bakur û rojava, dîsa zengilên dibistanan lê dan. Dibistan jî bi xwendekaran tijî bûn.

Xwendekara bi navê Hemrîn Selah Îbrahîm wiha got: "Bi destpêkirina sala nû ya xwendinê li navçeyê û tevî topbaranên domdar, dîsa jî dibistanan deriyên xwe vekirin. Em pir kêfxweş in ku em bi zimanê xwe yê dayikê fêr dibin. Piştî vebûna zanîngehan bi zimanê dayikê, qonaxên perwerde û fêrkirinê gihaştine asteke pir bilind."

Hemrîn Îbrahîm wiha pê de çû: "Êrişên ku van salên dawiyê qewimîn, em neçar kirin ku ji dibistanên xwe bi dûr bikevin. Lê îro û tevî êrişên rojane yên dewleta Tirk a dagirker em xwendina xwe dewam dikin. Ew ê nebe asteng li pêşiya hêvî û armancên me."

Hemrîn Îbrahîm diyar kir ku vegera wan a li dibistanan bersiva gelê herêmê ya li hember êrişên dagirkeriya Tirk e û wiha domand: "Dewleta Tirk a dagirker bi rêya êrişên xwe yên rojane hewl dide me qir bike û zimanê me tune bike. Berdewamkirina hînbûna me di dibistanan de, peyameke zelal e ku em ê di her şert û mercî de perwerdeya xwe bi zimanê xwe bidomînin.  Ew ê tu kes nekare zirarê bigihîne me."

Li gorî Rêveberiya Komeleya Perwerdeyê ya Rêveberiya Xweser a li navçeyê, 4 hezar û 51 xwendekar li Til Temirê di 75 dibistanan de dixwînin.

Xwendekarê bi navê Salih Dawrî jî nêrînên xwe wiha anîn ser ziman: "Her roj êriş li ser herêm û axa me tê kirin, lê em li vir in û em dev ji xwendina xwe bernadin. Em baş dizanin ku dagirkeriya Tirk dibistanên me dike armanc da ku hebûna me tune bike, lê em rê nadin û em ê xwendina xwe bidomînin."

Dawrî her wiha got: "Êriş dê nikarin xwendina me rawestînin. Em ê xwe bi pêş bixin heya ku em bighêjin astên herî bilind ji zanistê. Em bang li civak, hêzên navneteweyî, rêxistinên hiqûqî  û mafên mirovan ên navneteweyî dikin ku êrişên dewleta Tirk a dagirker li ser qada perwerdeyê û li ser giştî Bakur û Rojhilatê Sûriyê bi dawî bikin. "

Li gorî serjimariya Desteya Perwerdeyê, di 4 hezar û 700 dibistanên Bakur û Rojhilatê Sûriyê de 878 hezar xwendekaên seretayî, navîn û amadeyî hene.

(hs)

ANHA