​​​​​​​Şêniyên gundê Bênê: Em dev ji xaka xwe bernadin

Di çend rojên borî de, artêşa Tirk a dagirker û çeteyên wê yên ku li deverên derdora kantona Şehba û navçeya Şêrawa bi cih bûne, bi giranî êrişî wan deveran dikin, nexasim piştî ku serokkomarê Tirkiyê Erdogan israr kir ku ew ê êrişî Til Rifetê bike û dagir bike.

Gundên li eniya şer ji Merenaz, Tinib heta Aqîbê û Bênê û gelek gundên din ên kantona Şehbayê di êvara çarşemê de rastî êrişên hovane yên ji aliyê dagirkeriya Tirk ve hatin.

Di encamê de 2 xwişk Nesrîn (19) û Yasmîn Nîdal Hisên yên (20) ku ji şêniyên gundê Bênê yê Şêrewa ne birîndar bûn.

Dayika her du keçan, Nadiye Hisên ji ajansa me re wiha axivî: “Em şêniyên gundê Bênê ne û bi aramî li mala xwe dijîn, lê dagirkeriya Tirk û çetetên wê yên li deverên dagirkirî bi şev û roj êrişî me û gund dikin."

Nadiye Hisên wiha berdewam kir: “Şeva çarşemê em li hewşa malê bûn û zarokên min mal paqij dikirin, topek li pêşiya deriyê malê ket û di encamê de du keçên min Nesrîn û Yasmîn birîndar bûn, birîna Yasmînê di parsûyê de ye û sivik e. Lê birîna Nesrînê jî di piştê de ye. Ew her du hîna di Nexweşxaneya Avrînê de ne."

Di dawiya axaftina xwe de Nadiye Hisên wiha anî ziman: “Dagirkeriya Tirk bi rêya van êrişên hovane dixwaze me ji xaka me derxe, lê ez ji wê û alîgirên wê re dibêjim tevahî şêniyên gundê Bênê dev ji xaka xwe bernadin û em ê bi qehremanî li ber xwe bidin û planên we têk bibin.”

Welatiya bi navê Semîre Ebdo ya ji gundê Bênê jî wiha got: “Ji dema dagirkirina Efrînê ve dagirkeriya Tirk û çeteyên wê êrişî gund dikin û di encama wan êrişan de jî ziyan gihaştin mal, milk û mirovan. Şeva çarşemê jî di encama hedefgirtina malekê de, du xwişk birîndar bûn.”

Semîre Ebdo wiha domand: “Armancên dagirkeriya Tirk valakirina gund e. Şêniyên gundê Bênê yê bi ser gundê Basilê yê dagirkirî ve planên dagirkeriya Tirk baş dizanin û ew ê li ber xwe bidin û rê nedin dagirkeriya Tirk û çeteyên wê ku planên xwe pêk bînin.”

Semîre Ebdo di dawiya axaftina xwe de bêdengiya navneteweyî ya li hember kiryar û sûcên dagirkeriya Tirk ên li dijî şêniyên herêma Efrînê, bi tundî şermezar kir.

Ciwanê bi navê Sefqan Mosaco destnîşan kir ku ew amade ye parastina gnndê xwe ji planên dagirkeriya Tirk bike û ew ê rê nede wan ku planên xwe pêk bînin.

Sefqan Mosaco bang li rêxistinên mirovî û Rûsya kir ku bi erka xwe ya mirovî rabin û êrişên dagirkeriyê li ser herêmê bi dawî bikin û wê li ser sûcên wê muhasebe bikin.

(mh)

ANHA