Ji bo piştgiriya berxwedana gerîla gel li Hesekê daket qadan

Îro bi hezaran şêniyên kantona Hesekê bi dirûşma “Bi îradeya gelan û gerîla em ê dagirkeriya Tirk têk bibin” bi armanca piştgiriya berxwedana gerîla li çiyayê Kurdistanê daketin qadan.

Di çalakiyê de endama rêveber a Kongra Star a kantona Hesekê Lîlav Hisên axivî: “Di şexsê şehîd Zîlan, Sema, şehîdên Helincê û şehîd Ferhad em hemû şehîdên xwe bi bîr tînin.”

Lîlav Hisên her wiha anî ziman ku bi êrişên dewleta Tirk a dagirker re, herêm di qonaxeke girîng re derbas dibe û teqezî bi hevgirtina gelên herêmê kir.

Piştre endamê Meclisa Rûspiyan a kantona Hesekê Macid El-Erak daxuyaniyek bi navê meclisê xwend. Daxuyanî wiha ye:

 “Em wek Meclisa Rûspiyan a Hesekê û nûnerên civakên xwecih bi hemû ol, netewe û çandên xwe gefxwarinên dagirkeriya Tirk ên nû bi tundî şermezar dikin, her wiha em êrişên wê yên li ser Bakur û Rojhilatê Sûriyê, Şengal, Wargeha Mexmûrê, Zap û Herêmên Parastinê yên Medyayê şermezar dikin.

Em ê li kêleka QSD’ê bin ku di salên borî de li hember terorîstan û talankeran şer kirine.

Em bang li civata navneteweyî dikin ku xwedî li sozên xwe yên der barê parastina herêmê de derkevin û zextê li dagirkeriya Tirk bikin da ku herdu peymanên agirbestê yên 2019’an bi sponseriya navneteweyî hatine îmzekirin, pêk bîne.

Em bang dikin ku qedexekirina firîna balafiran li ser herêmên Bakur û Rojhilatê Sûriyê were ragihandin, ji bo parastina bi mîlyonan sivîlan ji êrişên hewayî yên dagirkeriya Tirk.”

Di dawiyê de girseya gel berxwedana gerîla silav kirin.

(mh)

ANHA