Dagirkeriya Tirk mêtîngehên nû li Cindirêsê ava dike

Çavkaniyên ji Efrîna dagirkirî piştrast kirin ku dewleta Tirk a dagirker bi destekdayîn û fînanseya komeleya Xeyir El-Ume 2 mêtîngehên nû li gundên navçeya Cindirêsê li nêzî mêtîngeha li gundê Dêrbelûtê ava dike da ku malbatên filistînî tê de bi cih bikin.

18 hezîran, 2022 13:30

ŞEHBA

Çavkaniyên taybet dan zanîn ku rêvberê komeleyê Xeyir El-Ume Ebdulcebar Şebelî ku navenda wê li Stenbolê ye tevî serokê rêxistina AFAD'ê û serokê meclisa herêmî ya Cindirêsê ya girêdayî dewleta Tirk, xebatên avakirina avahiyên mêtingeriyê li gundê Mihmediyê yê navçeya Cindirêsê dişopînin.

Komeleya Xeyir El-Ume bi armanca bicihkirina 325 malbatên filistînî, 2 mêtîngehên li gundê Mihemediyê yê navçeya Cindirêsê li nêzî sînorên Sûriyê-Tirkiyê yê li ser beravê çemê Efrînê û li kêlka avahiya mêtingeriyê ya li gundê Dêrbelût ava kir.

Çavkaniyan diyar kir ku hejmara malbatên filistinî ku hatine bakurê Sûriye gihaşt hezar û 488 malbat, her wiha gelek malbatên filistînî ji gundewarê Şamê, Bibîla, Bêt Sehim û Yelda û Colanê hatine.

Dagirkeriya Tirk bi armanca guhertina demografiya herêmên dagirkirî û çewisandina nasnameya wê ya resen, xebatên avakirina avahiyên mêtingeriyê zêde kirine.

(dm)

ANHA