73 xwendekarên din ji Zanîngeha Rojava derçûn

Nûnerên Rêveberiya Xweser, kadroyên perwerdeyê û malbatên xwendekaran di şahiya ku li hola civînan a Zanîngeha Rojava de hat lidarxistin, beşdar bûn.

Di destpêka şahiyê de deqeyeke rêz hate girtin, piştre hevserokê Zanîngeha Rojava Ebdulîlah Mistefa derçûn li xwendekar û malbatên wan pîroz kir û got"Bi îradeyeke xurt em îro tên zanîngeh û fakulteyên xwe, îro xwendekarên me dê bi raman û pênûsa xwe ji bo pêşeroja me têbikoşin."

Ji aliyekî ve, hevseroka Koordînasyona Zanîngehên Bakur û Rojhilatê Sûriyê Rohan Mistefa got: "Em şehîdên xwe yên ku bi saya fedakariya wan em gihîştin roja îro, roja derçûna koma çaremîn a xwendekarên me, bi bîr tînin. Ji ber wê jî ti kes nikare îradeya me ya xurt têk bibe, îradeya ku îro rê da me ku em zanîngehên xwe vekin û xwendekarên me jê derbiçin."

Rohan Mistefa anî ziman ku ew ê têkoşîna di nav şoreşa Rojava de dewam bikin heta ku bighêjin baştirîn encam.

Piştre, xwendekarên derçûyî yên, Fakulteya Zanistên Perwerdeyî, Fakulteya Wêje û Zanistên Mirovî, Jineolojî, Zanista Civakî û Fakulteya Petrokîmya" ji aliyê hevseroketiya Zanîngeha Rojava, fermandarê hêzên QSD'ê Mazlûm Gulo û berdevkê Kongra Star Remziye Mihemed ve, hatin xelatkirin.

Her wiha, bi boneya şahiyê, lêkolîner û helbestvan Salih Heydo çend helbest gotin, piştre hunermend Sefqan Orkêş, Beha Şêxo, Ecîb Îbrahîm, Îmad Darî û Îsmaîl Yûsif ve stran gotin.

Tê zanîn ku sê komên xwendekaran di salên 2019-2020-2021'an de ji Zanîngeha Rojava derçûn.

ANHA