Şêniyên Helebê sersaxî ji malbata şehîd Bekir re xwest

Meclisa Malbatên Şehîdan li pêşiya mala şehîd a li taxa Şêxmeqsûd a bajarê Helebê, konê sersaxiyê yê şehîd Bekir Bekir vegirt.

Endamên partiyên siyasî, saziyên sivîl, meclis û komîn, Hêzên Ewlekariya Hundirîn, Hêzên Parastina Civakê-Jin, YPG û YPJ'ê herikîn bin kon û sersaxî xwest.

Kon bi wêneyên şehîdan, rêber Abdullah Ocalan û alên Hêzên Parastina Civakê (HPC) hate xemilandin.

Destpêka merasîmê endama Meclisa Malbatên Şehîdan Remziye Salih axivî û got: "Şehîd rêya me ronî dikin û bi saya wan herêmên me ji çeteyên DAIŞ`ê rizgar bûn, êdî ji wê demê ve em bi aramî û aştî dijîn."

Remziye Salih di dawiya de soza şopandina rêya şehîdan da.

Bi navê Meclisa Taxa Şehîd Rûbar Qamişlo, endamê meclisê Mistefa Hemo axivî û sersaxî ji malbata şehîd Bekir, hemû şehîdan û rêber Abdullah Ocalan re xwest. Hemo têkildarî taybermendiyên şehîd Bekir wiha axivî: "Tevî bi temenê xwe mezin bû jî, lê tev li Hêzên Parastina Civakê bû, heta dawiyê bi hevalên xwe re paratina tax û welat kir û gihaşt asta şehadetê."

Hemo anî ziman ku şehîd Bekir tev li van hêzan bû, da ku destkeftiyên bi gel, şervanên YPG û YPJ li taxê bi dest xistin, biparêze.

Bi navê Kongra Star Îlham Hemdî axivî û got: "Şehîd bingeha şoreşê ne, ji lewma divê hemû gel xwîna şehîdan biparêzin û şopdarên rêya wan bin, ji ber ku azadî û jiyana birûmet ne tiştekî hêsan e. Kar û kedeke mezin ji me dixwaze."

Endamê Partiya Yekitiya Demokratîk (PYD) Elî Mistefa axivî û gotina rêber Abdullah Ocalan anî ziman: "Gelê min ê fedekar li rêya min nenêrin, lê belê li rêya şehîdên ku ji bo vî welatî canên xwe fedar kirine, binêrin."

Elî Mistefa destnîşan kir ku şehîd Bekir bav û heval bû, ji bo doza xwe kar û xebat kir lewma ew ê fedekariya wî ji bîr nekin.

Piştî axaftin bi dawî bûn, mamosteya zimanê kurdî Zekiye Mistefa nasnameya şehîd xwend û radestî malbatê kir.

Endamê HPC`ê şehîd Bekir Bekir 22`ê mehê gihaşt asta şehadetê.

(eh)

ANHA