Bi boneya salvegera şehadeta Viyan Soran li Minbicê semînerek hat dayîn

Di semînerê de Meclisa Xeta Rojava, Nivîsgeha Kombûna Jinan a Zenûbya, ciwanên şoreşger, partiyên siyasî û şêniyên Minbicê amade bûn. Semîner li hola Samir a li naverasta bajêrê Minbicê hat dayîn.

Semîner bi deqeyeke rêzgirtinê dest pê kir, dûvre endama rêveber a Kombûna Jinan a Zenûbya Fadye Resûl peyama şehîd Viyan Soran ku ji rêber Ocalan û gelê Kurd re rêkiriye xwendin. Di peyamê de wiha hate gotin: "Ji ronahiya şevên tarî rêber Abdullah Ocalan re, ji dema min navê te bihîstiye û tu nas kirî de ez bi jiyanê hesîm û min zanî ez kî me û çawa bijîm.

Çalakiya fedayî ku pêk tînim, redkirin û serîhildana li dijî zilmê ya ji hêla dewletên hegemon ve ya li dijî we û gelê Kurd e. Ez hêza xwe li hember vê têkoşîn, sosyalîsta zanistî û paradîgmaya nû nîşan didim.

Ez dixwazim peyama xwe ji paşverûtiya hundirîn û êrişên derve re rêkim û min gelek caran ji hevalên xwe yên şehîd re gotiye, xwezî ji canê min bihatir hebûya ku min di oxira rêbertî, gel û jinên bindest de feda bikira."

Dûvre Hêvîdar Muslim peyama şehîd û têkoşer Viyan Soran şîrove kir û wiha got: "Di 15’ê Sibatê de komploya li dijî rêber Ocalan hate destpêkirin. Ev komplo heta niha bi rêya hedefgirtina gelên ji bo azadî û aştiyê di şexsê rêber Ocalan de tê dikoşin ranawestiye. Lê çalakiya fedekarî ya şehîd Viyan Soran bersiva wan komplo û redkirina wan bû."

Hêvîdar Mislim wiha dawî li gotina xwe anî: "Bi saya şehîdên canê xwe di oxira parastina azadî û rûmeta gelên bindest de daye ev serkeftin li Bakur û Rojhilatê Sûriyê pêk hatin. Her wiha Rêveberiya Xweser jî li ser rêgeza neteweya demokratîk û biratiya gelan ku xwe dispêre fikirê rêber Ocalan hate damezrandin. Em ê bi hevgirtina gelan û pêkanîna fikrê rêbertî tevahî komployan têk bibin û armancên şehîdan bi cih bînin."

(fr)

ANHA