Lihevkirina Misir-Lubnanê li benda erêkirina DYA’yê ye

Wezîrê petrolê yê Misirê Tariq El-Mela got hîna rêveberiya DYA’yê erê nekiriye ku Misir gazê bi rêya ‘Xeta Erebî’ bigihîne Lubnanê. Her wiha piştrast kir ku peywendiyên baş bi DYA’yê re hene.

23 kanûn, 2021 09:31

NAVENDA NÛÇEYAN

Tariq El-Mela piştrast kir ku peywendiyên baş bi Dewletên Yekbûyî yên Amerîkayê (DYA) re di vê çarçoveyê de hene. El-Mela destnîşan kir ku Misir û Lubnan gelek çareseriyên girêdayî sererastkirina warê kehrebeyê dinirxînin.

Tariq El-Mele got: “Di gava yekemîn a çareserkirina warê kehrebeyê de Qahîre dê hebe. Misir dê gazê bide heta ku stasyon werin xebitandin. Cejna Noelê û sersalê dibe ku vê xebatê hinekî dereng bixe. Bi destpêkirina sala 2022`yan re gaz dê bigihêje Lubnanê.”

Wezîrê petrolê yê Misirê piştrast kir ku dema lihevkirina gazê ya di navbera Lubnan û Misirê de 10 sal e û got: “Em bi aliyên navneteweyî yên têkildar re di dan û standinan de ne, heta ku di pêşerojê de tiştên ne di hesabê me de çênebin û Qanûna Qeyser neyê binpêkirin.”

Tarq El-Mela diyar kir ku pêwîstiya Lubnanê bi îstiqrarê heye da ku xebatên lêgerîna petrol û gazê berdewam bike. El-Mela bi bîr xist ku di vî warî de pêwîstiya gelê Lubnanê bi hêviyekê heye.

(şx)