Yûnis: Êrişên li ser Zirganê berdewama êrişên qirkirinê yên li dijî gelê me ye

Şevê din leşkerên artêşa Tirk a dagirker û çeteyên gundê ji nuqteyên xwe yên li gundên Bab El-Xêr û Dawudiyê yên dagirkirî, gundên Esediyê, Rebîat, Mehermle, Til Emîr, Mezra, Til Werd, taxên rojavayê bajarokê Zirganê û sûka wê ya navendî  bi dijwarî topbaran dikin. Di encamê de 3 welatî jiyana xwe ji dest da û gelek birîndar bûn.

Têkildarî van êrişan, Heveserokê Meclisa Rêveber a Herêma Cizîrê Telat Yûnis ji ANHA'yê re axivî û diyar kir ku êrişên dawî yên dewleta Tirk ên li ser navçeya Zirganê berdewama êrişên qirkirinê yên dewleta Tirk a dagirker ên li ser herêmên Bakur û Rojhilatê Sûriyê ne. Yûnis got: "Ev êrişên terorist berdewama êrişên qirkirinê yên li dijî gelê me ye."

Telat Yûnis destnîşan kir ku armanc ji van êrişan dagirkirina herêmên din ên ewle ye. Her wiha bêdengiya Rûsya û Amerîka yên garantor ên li hemberî êrişên Tirkiyê şermezar kir û got: "Divê dewletên garantor erka xwe bi cih bînin û komkujiyên ku dewleta Tirk a dagirker li dijî gelê me yê berxwedêr pêk tîne, rawestînin."

Yûnis anî ziman ku gelê herêmê wê li hemberî van komkujiyan bêdeng nemîne û berxwedana xwe xurt bike.

ANHA