​​​​​​​Mîhrîcana Wêjeyê ya Osman Sebrî sibê dest pê dike

Mîhrîcana Wêjeyê ya Osman Sebrî ya Pêncemîn, îsal dê di 11'ê Cotmehê de bihata lidarxistin. Mîhrîcan ji ber şewba Koronayê hatibû taloqkirin û sibê dê dest pê bike.

Endama komîteya amadekar a mîhrîcanê Nerîman Evdikê diyar kir ku îsal beşdarî ji derveyî Bakur û Rojhilatê Sûriyê jî çêbûye û beşdarên ji tevahiya Kurdistan û cîhanê jî berhemên xwe şandine.

Nerîman Evdikê destnîşan kir ku mîhrîcan 4 rojan dewam dike lê par ji ber şewba Koronayê demkurt bû û diyar kir ku îsal jî ji ber heman sedemê dê mîhrîcan bi tene rojekê bidome.

Nerîman Evdikê her wiha diyar kir îsal tenê dê ji bo çîrokên bi kurdî û erebî pêşbirk çêbe û temaya çîrokan jî dê 'şoreş' be.

BERNAMEYA MÎHRÎCANÊ

Mîhrîcana Wêjeyê ya Osman Sebrî ya Pêncemîn sibê saet di 14.00'an de dê li Navenda Mihemed Şêxo ya Çand û Hunerê ya li Qamişloyê dest pê bike.

Di çarçoveya bernameyê de dê sînevîzyonek li ser jiyana Osman Sebrî, semînerên li ser wêjeyê û xwendina çîrokên beşdaran dê bên pêşkêşkirin. Her wiha di mîhrîcanê de dê şano, xwendina helbestan û muzîk jî hebin û dê bi merasîma xelatdayînê bi dawî bibe.

ANHA