'Kontrolkirina jêderên avê xeteriyê çêdike'

Hevseroka Meclisa Sûriya Demokratîk (MSD) Emîne Omer di Komxebata Navneteweyî ya Avê ya Bakur û Rojhilatê Sûriyê de axivî û got: “Sûriye welatekî herêma Rojhilata Navîn e ku jêderên avê lê kêm in. Her wiha ji beriya 10 salan ve aloziyê jiyan dike. Ji ber wê aloziyê û ji ber topbaranê û hedefgirtina jêderên avê, stasyonên derxistina kehrebeyê û kanalîzasyonê û binesaziya avê wêran bû.”

Emîne wiha domand: “Li ser mijara ava çemê Firatê ruxmî lihevkirina 1987`an Sûriyê her tim bi dewleta Tirk re bi nakok bû. Dewleta Tirk vê lihevkirinê binpê dike û bi herikîna ava çemê Firatê mîna ku mafê wê kontrol dike û bê hesabê ji Sûriyê re bigire projeyan û bendavan li ser çemê ava dike.”

Emîne destnîşan kir ku ji ber kiryarên dewleta Tirk ava çemê Firatê gelek kêm bûye û wiha dewam kir: “Ev nîşaneya rûdana karesateke mirovî dide û di encamê de ava vexwarinê û kehrebe li ser bi milyonan şêniyên Bakur û Rojhilatê Sûriyê qut bû.”

Emîne daxuyand ku dewleta Tirk aliyekî aloziya Sûriyê ye û ji bo pêkanîna armancên xwe yên siyasî, aborî û ewlehiyê rewşên dijwar ên li herêmê û avê wek çekekî li dijî gelên herêmê bi kar tîne. 

Emîne piştrast kir ku ji ber ku van siyasetên dijminane yên dewleta Tirk, herêmê bi xeteriya tunebûna ewlehiya xwarin û avê rû bi rû dihêle û li pêşiya pêkanîna îstiqrara siyasî û pêşketineke domdar dibe asteng.

 (şx)

ANHA

<iframe width="560" height="315" src="https://www.youtube.com/embed/UF5wlDvZUHA" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>