Şêx Ehmed Hemo li dijî siyasetên PDK`ê bang li gelê Başûr kir

Tevgerên PDK`ê li Herêmên Parastinê yên Medyayê û hevkariya wê bi artêşa Tirk re di şerê li dijî hêzên gerîla pir eşkere bûn. PDK`ê ji bo berjewendiyên partiyetî û kesayetî yên teng ku xizmeta gelê Kurd û Kurdistanê  nakin, li gorî xwesteka dewleta Tirk tev digere.

Gelê Kurd siyasetên PDK`ê weke xiyanetê pênase dikin, ji ber ku ew beşek ji planên dewleta Tirk e ku dixwaze Kurdistanê dagir bike û kurdan qir bike.

Têkildarî mijarê Hevserokê Meclisa PYD`ê ya kantona Kobanê Şêx Ehmed Hemo anî ziman ku PDK`ê ji bo berjewendiya xwe ne ji bo berjewendiya gelê Başûrê Kurdistanê, dixebite û tu têkiliya gelê başûr bi xiyaneta PDK`ê tune ye.

 ‘YÊN BI DIJMIN RE LIHEV DIKIN Û ÊRIŞÎ GELÊ KURD DIKIN XIYANETÊ DIKIN‘

Şêx Ehmed Hemo behsa dîroka reş a PDK`ê kir û wiha axivî: "Di sala 1973`yan de Tevgera Rizgariya Kurdistanê li Bakurê Kurdistanê derket. Dijmin her tim dixwaze ku şerê navxweyî di navbera kurdan de derxîne. Di sala 1992`yan de dijmin bi PDK`ê re lihev kir da ku gelê Kurd li Botan û Behdînanê yên Bakurê Kurdistanê qir bike. Dijmin li aliyekî û pêşmerge li aliyê din êrişî gerîla kirin."

Hemo bi domdarî got: "Yên ku bi dijmin re lihev dikin û êrişî gelê Kurd dikin, xiyanetê dikin. Yên ku bi Sedam Husên re lihev kirin û derfet dan ku li Enfal û Helebçeyê komkujî li dijî gelê Kurd pêk were, PDK`ê ne pêşmergeyên bi rûmet bûn."

Şêx Ehmed Hemo îşaret pê kir ku PDK`ê hebûna hêzên gerîla li çiya dike hincet, ji ber wê artêşa Tirk a dagirker çiya topbaran dike û şerê gerîla dike. Hemo destnîşan kir ku PDK`ê hevkariya dijmin dike da ku berjewendiyên xwe pêk bîne û beriya demekê 7 gerîla şehîd xist, tişta ku niha diqewime di sala 1992`yan de jî qewimî bû.

Şêx Ehmed Hemo got, tişta ku niha rû dide xiyaneteke mezin li gelê Kurd e.

Şêx Ehmed Hemo bang li gelê Kurd û tevahî welatparêzeran kir ku li dijî siyasetên PDK`ê  helwesteke xurt nîşan bide û wê neçar bike ku dev ji rêya şaş berde û wiha domand: "Ji ber ku heger vê rêyê berdewam bike dê encamên wê xirab bin, lew re divê pêşmerge vê siyasetê red bikin û divê PDK`ê ji bo yekitiyê vê siyasetê biguhere."

Hevserokê Meclisa PYD`ê ya kantona Kobanê Şêx Ehmed Hemo wiha dawî li axaftina xwe anî: "PDK`ê bûye weke nexweşiya penceşrê di laş de ku bi dermanan xilas nabe. Yan wê laş (Kurdistan) parçe bike yan jî divê were jêkirin û divê gelê Başûrê Kurdistanê vê yekê bike."

(bx)

ANHA

<iframe width="560" height="315" src="https://www.youtube.com/embed/CRjJbvfsJ9w" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>