​​​​​​​Şêniyên Helebê şehîdên Berxwedana 14`ê Tîrmehê bi bîr anîn

Merasîma bîranîna şehîdên Berxwedana 14`ê Tîrmehê ku Kongreya Star li taxa Şêxmeqsûdê ya Helebê orgenîze kiriye, bi beşdariya bi sedan şêniyên taxê, endamên saziyên sivîl û partiyên siyasî li dar ket.

Cihê merasîmê ya ku li qada Cebanat a li aliyê rojhilatê taxa Şêxmeqsûdê li dar ketiye, bi wêneyên rêber Ocalan û wêneyên Berxwedana 14`ê Tîrmehê hate xemilandin.

Merasîma bîranînê bi rêzgirtinê dest pê kir, piştre endamê Partiya Yekitiya Demokratîk (PYD) Bedran Hemo axivî û wiha got: "Serkêşiya Berxwedana 14`ê Tîrmehê şehîd Xeyrî Dûrmûş, Kemal Pîr, Akif Yelmaz û Alî Çîçek bû, her wiha berxwedana wan li dijî hişmendî û dîktatoriya dewleta Tirk derbeyeke mezin bû."

Bedran wiha domand: "Berxwedana girtîgehan a li dijî darbeyê 12`yê Îlonê dest pê kir. Ev berxwedan ji yek çalakiyên rewa, dîrokî û herî mirovane bû û bi xwe re encamên erênî yên dîrokî anîn."

Têkildarî siyasetên AKP`ê Bedran ev nirxandin kir: "Dema em behsa girtîgeha Amedê dikin, di heman demê de em behsa kiryarên desthilata heyî dikin ku Tirkiyê veguherand girtîgeheke ji bo qetilkirin, girtin û têkbirina vîna gelan."

Li aliyekî din jî endama Kongreya Star Remziye Salih îşaret bi girîngiya avakirina komîteyên hiqûqî kir, da ku hemû sûcên li dijî gelê Kurd pêk tên werin kişfkirin û civaka navneteweyî jî nas bike.

Remziye bang li NY`yê, Amerîka û Komkara Ereb kir ku li dijî dagirkeriya Tirk bisekinin ku li ser ewlehî û aramiya cîhanê tevahî xeteriyekê çêdike.

Remziye di dawiyê de da zanîn ku dewleta Tirk nikare vîna gel bişkîne û rûmeta wan desteser bike, ji ber ku gelê Kurd têkoşîna xwe ji berxwedana girtîgehan wergirtiye.

Piştî axaftin bi dawî bûn, têkildarî berxwedana girtîgehan û hêza wan a li dijî siyaseta dewleta Tirk sinivîzyonek hate pêşandan.

(eh)

ANHA