Li Hesekê çalakiyên meha çandê

Bi diruşma"Dem dema azadiyê ye" û di çarçoveya hemeleya piştgiriya çand û hunerê de, Tevgera Mezopotamyayê şahiyeke hunerî li Hesekê li dar xist.

ÇAND Û HUNER

12 tîrmeh, 2021 20:38

HESEKÊ

Tevgera Mezopotamya ya Çand û Hunerê ya Herêma Cizîrê bi diruşma "Dem dema azadiyê ye" û di çarçoveya hemeleya piştgiriya meha çandê ya piştevaniya çand û hunerê de çalakiyek li dar xistin.

Şahî bi beşdarbûna bi dehan endamên saziyên sivîl û leşkerî li parka Xabûr a Hesekê li dar ket û tê de komên ji Kobanê, Qamişlo û Dêrikê hunerên xwe pêkêş kirin.

Şahî bi deqeyeke rêzgirtinê dest pê kir, dûvre Hevseroka Komîteya Çand û Hunerê ya Herêma Cizîrê Nesrîn Botan axivî û wiha got: "Armanc ji vê hemeleyê piştgiriya çand û hunera li herêmê ye, em Tevgra Çand û Hunerê dê piştgiriya çanda xwe bikin û dê ji dijmin re îsbat bikin ku çanda me dewlemend e û dê bi vê hemleyê piştevaniya hêzên xwe bikin û li rex wan bisekinin."

Nesrîn Botan wiha domand: "Em bi hemleya xwe piştgiriya xwe ji hêzên gerîla û pêşmergeyan re nîşan didin û bang dikin şerê navxweyî qedexe bikin."

Piştî axaftinê, koma Botan a Navenda Çand û Hunerê ya Kobanê, koma Cûdî ya ji Dêrikê stranên xwe pêşkêş kirin û şahî bi gerandina dîlan ji hêla komên beşdar ve bi dawî bû.

(fr)

ANHA