`Berxwedana gerîla berxwedana gelê Kurd e`

Nerazîbûnên li hemberî êrişên dewleta Tirk a dagirker ên li dijî herêma Garê ya Başûrê Kurdsitanê didomin.

Dewleta Tirk di çarçoveya rêzeêrişên xwe yên li dijî xaka Kurdistanê de di 10`ê Sibatê de êriş li dijî herêma Garê da destpêkirin.

Şêniyên Qamişloyê êrişên dewleta Tirk ên domdar ên li dijî Başûr û Rojavayê Kurdistanê şermezar kirin. Her wiha dan xuyakirin ku êrişên li dijî Garê û yên li dijî Rojava berdewama projeya dagirkirina Kurdistanê ye.

`Ê KU RÊ DA VÊ ÊRIŞÊ, AJAN E`

Talal Elî El-Hîso diyar kir ku dewleta Tirk ji êrişan armanc dike ku her projeyeke kurdî û doza kurd tune bike û wiha got: "Ê ku pêkanîna van êrişan hêsan dike  ajanê dewleta Tirk e. Li Başûrê Kurdistanê saziyên Tirk hene û leşkerên istixbarata Tirk bi hêsanî di nav de digerin."

Telal El-Hîso banga xurtkirina têkoşînê li hemberî dewleta Tirk û derxistina dagirkeran ji herêmê kir.

El-Hîso destnîşan kir ku dewleta Tirk bê ku berxwedanek li hemberî wî bê kirin, gihaşt sînorên Dihokê û pirsî; Gelo çima hikumeta Başûrê Kurdistanê bêdeng e? El-Hîso diyar kir ku gerîla hêviya tekane ya gelê Kurd e ku ji dagirkeriya Tirk xilas bibin. Ji ber ku gelê Kurd baweriya xwe bi hêzên li Başûrê Kurdistanê winda kir.

Ji aliyê xwe ve Ferhan Hiso got, yekitiya Kurd rêya tekane ya bidawîkirina êrişên dewleta Tirk ên li dijî axa Kurdistanê ye û bang li ciwanan kir ku bibin yek û li hemberî êrişên li dijî Kurdistanê li ber xwe bidin.

Feysel Ebdulfetah banga pêkanîna yekitiyê li hêzên kurdî kir.

`DIVÊ CIWANÊN KURD BERÊ XWE BIDIN GARÊ`

Viyan Yûsif bang li ciwanên Kurd kir berê xwe bidin çiyayên Garê, piştgiriya berxwedana gerîla bikin û li hemberî dewleta Tirk bisekinin.

Wedha Hesê Şêxmûs jî got, berxwedana gerîla li çiyayên Garê, berxwedana gel e, gerîla hêza tekane ye ku nûnertiya gelên Kurd dike ku dikare binxistina projeyên dewleta Tirk a dagirker têk bibe.

Wedha destnîşan kir ku êrişên dewleta Tirk ên li dijî erdnîgariya Kurdistanê berdewam in û tu carî ranewestîne, li Başûrê Kurdistanê êrişî Garê dike, li Rojava êrişî Eyn Îsa û herêmên Şehbayê dike, gefa dagirkirina Dirêk û Şengalê dixwe û li Bakurê Kurdistanê siyasetmedarên Kurd digire.

Wedha wiha gotinên xwe bi dawî kir: "Divê Kurd li hember êrişên dewleta Tirk serî hildin û rê nedin dewleta Tirk ku herêmên din ên kurdan dagir bike."

(şx)

ANHA

<iframe width="560" height="315" src="https://www.youtube.com/embed/Cd6LkhxhbCI" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>