Xelatên Pêşbirka "Nivîskarê Pêşerojê" hatin belavkirin

Desteya Çandê ya Herêma Cizîrê şahiya dawîkirina pêşbirka "Nivîskarên Pêşerojê" li navenda Çand û Hunerê Mihemed Şêxo ya bajarê Qamişlo ji zarokên ku tev li pêşbirkê bûne li dar xist. Di şahiyê de navên zarokên ku di pêşbirkê de bi ser ketin hatin eşkerekirin û hatin xelatkirin.

Şahî bi beşdarbûna endamê Desteya Çandê ya Herêma Cizîrê û hevseroka Meclisa Rêveber a Herêma Cizîrê Nezîra Gewriyê, bi dehan zarok û malbatê xwe şahî dest pêkir.

Hola şahiyê bi nepoxên renge reng û bi amûrên mûzêkên zarokan hatibû pêşkêşkirin. Şahî bi deqeyeke rêzgirtin dest pê kir.

Destpêkê hevseroka Meclisa Rêveber a Herêma Cizîrê Nezîra Gewriyê axivî, Nezîra da zanîn ku wan şoreşa Bakur û Rojhilatê Sûriyê bi şoreşeke leşkerî dest pê kir, ew ê bi şoreşeke çandî û civakî berdewam bikin û got: "Em baş dizanin ku di van salên dawiyê de teknelojiya pêşket û cîhan tev de pê mijûl dibe, bi taybet zarok, ku ew yek asta fikrê û çandê li cem mirovan kêm dike".

Di dawiya axaftina xwe de Nezîra malbatê zarokan her wiha Destya Çandê ya Herêma Cizîrê spas kir.

Piştre koma Kulîlkên Girbawî ya stranan û koma Şehîd Cebel Qamişlo ya govendê berhemên xwe pêşkêş kirin.

Di dawiya şahiyê de komîteya amadekar pirtûk, spasname û diyarî radestî zarokan kirin, piştre 6 zarok ji beşê Kurdî û 6 zarokên din ji beşê Erebî li ser sê astan hatin xelatkirin

Desteya Çandê ya Herêma Cizîrê, bi armanca teşwîqkirina zarokan li ser xwendina pirtûkan, pêşbirka bi navnîşan "Nivîskarên Paşerojê" û bi dirûşma "Şitla îro dara sibe ye" di meha Tebaxa borî de ragihand.

Tê payîn ku pêşbirka Nivîskarê Paşerojê ya Yekemîn a Zarokan dê bi awayekî asayî her sal di Hezîranê de li dar bikeve.

(sb)

ANHA

<iframe width="560" height="315" src="https://www.youtube.com/embed/VBjqLeLZS-Y" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>