Li Holê banga hevgirtina li hember êrişên dagirkeran hat kirin

Helwestên şermezarkirinê ji aliyê gel ve ji bo bombebarana balafireke dewleta Tirk li ser maleke sivîlan li gundê Helinc ê Kobanê zêde dibe. Di encama bombebaranê de 3 jin şehîd bûbûn.

Meclisa navçeya Holê û Kongreya Star ji bo şermezarkirian sûcên dewleta Tirk û çeteyên bi navê Artêşa Nîştimanî ya Sûriyê û komkujyên li dijî gelên Bakur û Rojhilatê Sûriyê meşek li dar xist.

Bi sedan şêniyên navçeyê û şêxên eşîran li pêşiya navenda perwerdeyê ya navçeyê kom bûn û ber bi çerxerêya sereke ya navçeyê ve çûn. Di meşê de wêneyên şehîdan û pankartên bi nivîsên şermezarkirina êrişên dewleta Tirk ên li dijî gelê Bakur û Rojhilatê Sûriyê û silavkirina berxwedana jinan li Bakur û Rojhilatê Sûriyê hatin hildan.

Meş li çerxerêya sereke veguherî mîtîngê. Di mîtîngê de Şêx Edhem El-Salih bi navê rûspiyên eşîran axivî. Şêx Edhem El-Salih diyar kir ku di dema hemû hêz li çareserkirina aloziyê digerin, rejîma Tirkiyê êriş û sûcên li dijî herêmê didomîne çi bi destwerdanên leşkerî û çi bi topbarana li ser herêmê.

Edhem El-Salih destnîşan kir ku bombebarana li ser herêmên Şengal, kampa Mexmûr û gundê Helinc ku di encama wê de sivîl şehîd bûn bi lihevkirina di navbera Rûsya, DYA û dewleta Tirk de pêk hat û êriş hatin kirin sûcdariya rejîma Tirkiyê diyar dike.

Her wiha bi navê Kongreya Star Menal Xidir jî axivî û êrişên dewleta Tirk û bombebarana li ser Şengal û Mexmûrê şermezar kir û wiha domand: "Armanca êrişan ku îradeya jinên azadîxwaz û birêxistinkirî bişikînin."

Paşê Salim El-Salim bi navê meclisa Malbatên Şehîdan a navçeya Holê axivî û destnîşan kir ku armanca dewleta Tirk ji êriş û sûcên pêk tîne ku tevlîheviyê di navbera pêkhateyên Bakur û Rojhilatê Sûriyê de derxîne û wiha dawî li axaftina xwe anî: "Em soz didin ku emê şopdarên rêya şehîdên xwe bin heta ku em tevahî xaka xwe ji dijminan rizgar bikin û azadiya hemû pêkhateyan bidest bixin."

Mîtîng bi dirûşmên banga hevgirtinê li hember êrişan, bi dawî bû.

(bx)

ANHA