Cenazeyê şehîd Idrîs li Kobanê hate veşartin

Bi sedan şêniyên kantona Kobanê tev li merasîma oxirkirina cenazeyê şervanê Hêzên Erka Xweparastinê Idrîs Mehelî bûn yê ku di encama teqîna mayînekê li herêma Eyn Îsayê şehîd bû.

Girseya gel cenazeyê şehîd Idrîs Mehelî li Goristana Şehîd Dîcle wergirtin. Merasîm bi deqeyek rêzgirtin destpê kir.

Piştre hevserokê Meclisa Rêveber a Herêma Firatê Mihemed Şahîn sersaxî ji malbatên şehîdan re xweset û got: "Di rêya têkoşîn û berxwedanê de xwîna pêkhateyên herêmê ji Kurd, Ereb û Suryan tev hev bû. Ji destpêka Şoreşa 19`ê Tîrmehê ve me got azadiya gelê Kurd tê wateya azadiya tevahiya gelan. Şoreşa me ev yek li Bakur û Rojhilatê Sûriyê îsbat kir."

Endama rêveber a Tevgera Jinên Ciwan a herêma Firatê Arîn Kobanê axivî û sersaxî ji malbatên şehîdan re xwest û got: "Em li hember sûcên ku li dijî gelê me têne kirin, bêdeng namînin. Em soza şopandina rêya şehîdan didin heya a serkeftin, azadî, edalet û mirovahiyê ji gelan re pêk bînin."

Di dawiya merasîmê de nasnameya şehîd Idrîs xwend û radestê malbatê kir.

 Her wiha Meclisa Malbatên Şehîdan nasnameyên 7 şehîdên Berxwedana Rûmetê ragihand û nasnameyên wan dane malbatên wan. Nasnameyên şehîdan wiha ne: Dilxwaz Şêxo ( Çavreş Kobanê), Ehmed Muslim (Xalo Kobanê), Hesen Bozan (Serdar), Welat Îsmaîl (Ferhad Kurdistan), Harûn Hoşeng (Harûn Amed), Meysa Ehmed (Dêrism Rojhilat) û Mehsûm Xolo (Kendal Koçer).

Piştre girseya gel cenazeyê şehîd Idrîs Mehelî di nava diruşmeyên dilsoziya bi şehîdan re spartin axê. (şx)

(şx)

ANHA