Li Kobanê xebata avakirina dibistana nû dîsa dest pê kir

Desteya Rêveber a Herêmî û Şaredariyan a Herêma Firatê bi hevkariya Desteya Fêrkirin û Perwerdeyê ji nû ve dest bi karê avakirina dibistana nû ya li Taxa Şehîd Kawa ya Kobanê kir ku piştî êrişên dewleta Tirk ên li herêmê rawestiyabû.

3 sibat, 2020 14:02

KOBANÊ-SAMIR OSMAN

Êrişa dewleta Tirk a dawîn li herêmên Bakur û Rojhilatê Sûriyê bû sedema rawestandina tevgera çûn û hatinê û gelek projeyên xizmetguzariyê. Ji wan projeyan yek jî projeya avakirina dibistaneke nû li bajarê Kobanê ye.

Desteya Rêveber a Herêmî û Şaredariyan a Herêma Firatê hevkariya bi Desteya Fêrkirin û Perwerdeyê ya Herêma Firatê beriya 3 rojan ji nû ve dest bi xebata avakirina dibistana li Taxa Şehîd Kawa ya Kobanê kir.

Hevseroka Desteya Fêrikirin û Perwerdeyê ya Herêma Firatê Nesrîn Şêx Keyad got dê dibistan 4 qat be û tê de 24 fêrgeh hebin. Nesrîn Keyad destnîşan kir ku dê dibistan têra hezar xwendekaran bike û her wiha park û hola dibistanê ya taybet jî lê heye.

Nesrîn Şêx Keyad anî ziman ku dema pratîkî ya projeyê 9 meh e. Lê belê dê dibistan piştî salekê bi temamkirina giştî radestî Desteya Fêrkirin û Pewerdeyê bibe.

Rûbera giştî ya ku dê dibistan li ser bê avakirin, hezar û 100 metre çargoşe ye lê belê li taxê dibistanek bi çend odeyên ku hazir hatine çêkirin, heye û Rêveberiya Xweser wek çareseriyeke demkî heta avakirina dibistanê xistiye xizmetê.

(fr)