Cenazeyê şehîd Nesir li Reqayê hate veşartin

Bi sedan şêniyên bajarê Reqayê beşdarî bi merasîmekê veşartina cenazeyê şervanê QSD`ê Abdulqadir Esfer (Nesir) ku di dema pêkanîna erkeke leşkerî li bajarê Reqayê de şehîd bû, oxir kirin. Her wiha Meclîsa Malbatên Şehîdan nasnameya şehîd Hemîd El-Xelef (Kawa) ku di Cotmeha sala borî di Berxwedana Rûmetê de li derdorê bajarê Girê Spî şehîd bû, ragihand.

Merasîma oxirkirinê li goristana şehîdan a li gundê El-Hikumiyê yê bakurê Reqayê li dar ket û bi deqeyeke rêzgirtinê dest pê kir. Piştre toraneke leşkerî ji aliyê şervanên Hêzên Sûriye Demokratîk (QSD) ve hate lidarxisit.

Ji fermandarên Meclîsa leşkerî ya Reqayê Arif Ebo Ebdo axivî û îşaret bi fedekariyên şervanên QSD`ê yên li eniyên şer kir. Her wiha diyar kir ku şervanên QSD`ê li hemberî êirşên barbarî yên dewleta Tirk a dagirker û çeteyên DAIŞ`ê û El-Nusrayê, bendekî xurt ava kirine. Arif her wiha teqez kir ku dê heta rizgarkirina hemî herêmên dagirkirî, rêya şehîdan bişopînin.

Yek ji endamên rêveber a Rêveberiya Jinan a Reqayê Nadiya Ehemd jî sersaxî da malbata şehîdan û diyar kir ku şehîdan bi fekekariyên xwe rêya azadî û rûmetê ji nifşên bên re, xêz kirin.

Piştre endama rêveber a Meclîsa Malbatên Şehîdan Emîne El-Elî wesîqeta şehîd Nesir xwend û nasnameya şehîd Kawa ragihand û her du wesîqe radestî malbatên şehîdan kir.

Di dawiya merasîmê de cenazeyê şehîd Nesir di nava dirûşmeyan de hate veşartin.

(cx)

ANHA