Ji bo piştgiriya gelê Rojava li Almanyayê pêşangehek li dar ket

Bi navê "Hûn ne bi tenê ne" ji bo piştgiriya herêmên Bakur û Rojhilatê Sûriyê duh bi beşdarbûna gelek hunermendên şêwekar ên Kurd û ewropî, pêşangeha hunera şêwekariyê dest pê kir.

Pêşangeh li rawestgeha metroyê ya bajarê Krefeld ê Almanyayê bi tevlêbûna 18 şêwekarên Kurd û 22 şêwekarên ji Swîsre, Almanya, Denmark, Fransa û Awisturyayê tê lidarxistin.

Di merasîma vekirina pêşangehê de parlamaterê Alman Ufa Schulma û nûnerên rêxistina mafên mirovan û rêxistina mafên penaberan, Wezareta Çandê ya Almanyayê û hejmarek ji saziyên sivîl ên Alman amade bûn.

Di pêşangehê de dê bi dehan tabloyên ku şêwekaran ji bo piştgiriya herêmên Bakur û Rojhilatê Sûriyê xêz kirine, dê werin nîşandan. Di tabloyan de şoreşa ku 8 sal e li dar e û rewşa herêmê guherand , her wiha berxwedana li dijî çeteyên DAIŞ`ê tê nîşandan.

Hunermend Cîhan Mihemed ku tev li pêşangehê bûye, wiha ji ajansa me ANHA`yê re axivî: "Em silav û hezkirinên xwe ji gelê xwe yê Rojava re dişînin. Bi navê min û bi navê komeleya ‘Reng Art’ em dibêjin hûn ne bi tenê ne. Hebûn û tunebûna me dê bi hev re be."

Pêşangeh dê heta 22`yê Çileyê dewam bike.

(cx)

ANHA