QSD’ê 34 girtî serbest berdan

Îro 34 kesên ku berê li ser paşxaneya hevkarî û têkiliyên wan bi çeteyên DAIŞ’ê re hatibûn girtin, hatin berdan. Her wiha di merasîma serbestberdanê de, rûspî û şêxên eşîrên herêma Hesekê, hevseroka Meclisa Qanûnsaz a Herêma Cizîrê Muawiniya Mela Ehmed, nûnerên saziyên sivîl û Komîteya Têkiliyan a QSD’ê ya Hesekê amade bûn.

Bi navbeynkarî û kefaleta rûspî û şêxên eşîran û bi însiyatifa QSD’ê girtî hatin berdan.

QSD’ê beriya demekê beş bi beş şêniyên Bakur û Rojhilatê Sûriyê yên ku destê wan di xwîna gelê Sûriyê de tune ye, serbest berdan.

Merasîma serbestberdanê li Navenda Meclisa Rûspiyan a Hesekê pêk hat. Di merasîmê de hevseroka Meclisa Qanûnsaz a Herêma Cizîrê Muawiniya Mela Ehmed, fermandarê Buroya Têkiliyan a QSD’ê Şiyar Hesekê, serokê Meclisa Qebîleya El-Cebûr û endamê Meclisa Rûspiyan Fewaz El-Zewbea axivîn.

Axêveran piştast kir ku ji bo rêzdayîna li ser daxwazên rûspî û şêxên eşîran û kefaleta wan, her wiha jî ji ber yên ku hatine berdan ji şêniyên vî welatî ne û li aliyekî din jî bi însiyatîfa dayîna şansekê ya guhartinê, ev girtî hatin berdan. Li aliyekî din jî axêveran spasiya QSD û tevahî aliyên ku piştevaniya vê însiyatîfê kirine û daxwazên wan bersivandine, kir.

Her wiha axêveran bang li kesên hatine berdan kir ku vegerin rêya rast, dest bi jiyaneke nû bikin ku tê de sûd hem ji wan re û hem jî ji civak û welatê wan re hebe. Her wiha jî li pêşiya kesên ku bixwazin tevlihevî û fîtneyan derxin da ku bigihînin armancên xwe, bigirin û bibin piştevanên şênî û hêzên xwe yên ku parastina wan û welatê wan dikin.

(fr)

ANHA

<iframe width="560" height="315" src="https://www.youtube.com/embed/cQEhh9Tm898" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>